کنداپور کے قریب ناوندہ میں طالب علم سڑک حادثہ میں جاں بحق؛ نعش کے چیتھڑے سڑک پر بکھر گئے، دلخراش منظر
کنداپور 17 اگست (ایس او نیوز) بیندور تعلقہ کے ناوندہ نیشنل ہائی وے پر آج پیر دوپہر کو پیش آئے ایک دلخراش سڑک حادثہ میں ایک طالب علم کی موقع پر ہی موت واقع ہوگئی جس کی شناخت قریبی علاقہ مرونتے کے رہنے والے 17 سالہ کشن کھاروی کی حیثیت سے کی گئی ہے۔
بتایا گیا ہے کہ کشن ناوندہ سرکاری جونئیر کالج میں پی یو سی اول کامیاب ہونے کے بعد پی یو سی دوم میں داخلہ لینے کالج پہنچا تھا، ضروری سرٹی فیکٹ کی زیراکس کرنے روڈ کراس کررہا تھا کہ تیز رفتار ٹرک کی زد میں آگیا، بتایا گیا ہے کہ ٹرک کا ایک پہیہ اس کے سر پر سے گذر گیا جس کی وجہ سے نہ صرف اس کی موت واقع ہوگئی جبکہ جسم کے چیتھڑے پوری سڑک پر بکھر گئے۔
حادثے کی اطلاع ملتے ہی گنگولی 24X7 ایمبولنس موقع پر پہنچ گئی اور سماجی کارکن ابراہیم گنگولی، ابرار گنگولی اور رجب گنگولی نے مقامی لوگوں کی مدد سے بکھرے جسم کے تکڑوں کو یکجا کرتے ہوئے نعش کو بیندور سرکاری اسپتال پہنچایا۔ حادثے کے فوری بعد جائے وقوع پر سینکڑوں لوگ جمع ہوگئے تھے۔ نعش کا بھیجا بکھرا پڑا تھا اور دلخراش منظر پیش کررہا تھا۔(اللہ ہر ایک کو اس طرح کے حادثات سے محفوظ رکھے)
بیندور سرکل پولس انسپکٹر سریش نائک، پی ایس آئی سنگیتا و دیگر عملہ بھی حادثے کے فوری بعد جائے وقوع پر پہنچ گیا تھا۔
لاری ڈرائیور کو گرفتار کرلیا گیا ہے، بیندور پولس تھانہ میں معاملہ درج کیا گیا ہے۔