بھٹکل 20/جنوری (ایس او نیوز) بھٹکل میں منکولی اور ماروتی نگر ترقیاتی کمیٹی کوشش کررہی ہے کہ منکولی اور اطراف میں گلمی، بلالکھنڈ، تلاند، ویر وٹھل روڈ، ہائیڈکی، مٹھلّی اور موڈبھٹکل کے علاقوں میں پینے کے پانی کی قلت دور ہوجائے۔
مذکورہ کمیٹی کی طرف سے منعقدہ ایک پریس کانفرنس میں عہدیداروں نے بتایا کہ انہیں اس ضمن میں جزوی کامیابی ملی ہے۔ منتخب عوامی نمائندے اور افسران کے ساتھ تال میل ہورہا ہے اورعوام کے تعاون سے یہاں کی ندیوں میں چھوٹے چھوٹے بند باندھ کر پانی روکنے سے ان علاقوں میں موجود کنوؤں میں پانی کی سطح بڑھنے لگی ہے۔ اسی طرح مزید کئی علاقوں میں ندیوں اور نالوں پر بند باندھنے سے آئندہ دنوں میں یہاں پانی کی قلت دور ہوسکتی ہے۔
اس کے علاوہ ترقیاتی کمیٹی نے نیشنل ہائی وے 66کی توسیع کی وجہ سے پیش آنے والی دشواریوں اور اس کی وجہ سے بعض مقامات پر چھوٹی ندیوں میں مٹی اور پتھر جمع ہونے جیسے مسائل کا بھی تذکرہ کیااور منکولی علاقے میں آس پاس سروس روڈ کی تعمیر کی ضرورت پر بھی زور دیااورنیشنل ہائی وے اتھاریٹی کے افسران سے اپیل کی کہ و ہ اس مسئلے پر توجہ دیں۔اوربرساتی پانی کی نکاسی کے لئے نالوں کی تعمیر بھی کی جائے۔
اس موقع پر منکولی اور ماروتی نگر ترقیاتی کمیٹی کے صدر ستیش کمار، اعزازی صدر گنپتی پربھو، جنرل سیکریٹری ناگراج نائک، اشوک ہیگڈے، پرمیشور نائک، شنکر شیٹی، رمنّا بلیگار، شنکر پائی، ہریش نائک، راگھویندرا گوالی وغیرہ موجود تھے۔