بھٹکل میونسپالٹی دکانوں کا معاملہ؛ خودسوزی کرنے والا رام چندرانائک چل بسا؛ بھٹکل میں احتیاطی طور پر اسکولوں اور کالجوں میں چھٹی کا اعلان
بھٹکل 16/ستمبر (ایس او نیوز) میونسپالٹی دکانوں کو خالی کرانے کے مسئلہ پر دو روز قبل ایک شخص رام چندرا نائک نے خودسوزی کی تھی اور اسے شدید زخمی حالت میں منی پال اسپتال منتقل کیا گیا تھا، رات قریب دو بجے اُس کی موت واقع ہونے کی خبر موصول ہوئی ہے، جس کے بعد پھر ایک بار بھٹکل میں حالات کشیدہ نظر آرہے ہیں۔
ویسے ضلعی انتظامیہ نے پیشگی طور پر ہی بھٹکل میں پولس کا نہایت سخت بندوبست کررکھا ہے اور دوسرے اضلاع سے بھی پولس فورس بھٹکل میں منگوائی گئی ہے، پھر بھی احتیاطی طور پر ضلعی انتظامیہ نے چندرانائیک کی موت کی خبر ملتے ہی بھٹکل میں اسکولوں اور کالجوں میں چھٹی کا اعلان کردیا۔
چندرانائک کی میت صبح قریب نو بجے آسارکیری میں واقع اُن کے مکان پر پہنچ چکی ہے اور کافی لوگ ان کے مکان پر آخری رسومات کی ادائیگی کے لئے جمع ہیں۔
شہر میں حالات بالکل پرامن ہیں اور حالات کو قابو میں رکھنے اور امن و امان کی فضا کو یقینی بنانے ضلع کے ایس پی ونائک پاٹل خود بھٹکل میں ہی موجود ہیں اور حالات پر گہری نظر رکھتے ہوئے پولس کو ہرطرف چوکس کررکھا ہے۔ انہوں نے بتایا کہ عوام کو ڈرنے اور خوف محسوس کرنے کی ضرورت نہیں ہے ، یہاں حالات بالکل نارمل ہیں ۔