دبئی سمیت عمان میں بھی گرج چمک کے ساتھ طوفانی بارش
دبئی، 9/مارچ (ایس او نیوز /ایجنسی) دبئی سمیت متحدہ عرب امارات کی مختلف شہروں میں موسلا دھار بارش ہونے سے کئی علاقوں میں سڑکوں پر پانی جمع ہوگیا جس سے عام زندگی درہم برہم ہوگئی۔ عرب میڈیا کے مطابق ہفتہ کی صبح دبئی ،ابو ظبی، فجیرا اور دیگر علاقوں میں گرج چمک کے ساتھ موسلا دھار بارش ہوئی جبکہ دبئی کے مختلف علاقوں میں طوفانی بارش کے باعث سڑکیں زیر آب آگئیں اور ٹریفک جام ہوگیا۔
العین، عجمان اور فجیرہ سمیت دیگر علاقوں میں بھی طوفانی بارش سے معمولات زندگی متاثر ہونے کی اطلاعات ہیں۔ محکمہ موسمیات نے شارجہ ، دبئی ، عجمان ، راس الخیمہ ، العین اور فجیرہ میں شدید بارشوں کے خدشے کے پیش نظر الرٹ جاری کرتے ہوئے لوگوں کو احتیاط برتنے کی ہدایت جاری کی ہے۔
عمان بھی بارش: متحدہ عرب امارات کے پڑوسی ملک عمان میں بھی سنیچر صبح سے بارش ہونے کی اطلاعات ہیں، عرب میڈیا کے مطابق عمان میں بھی طوفانی ہواؤں اور موسلادھار بارش نے شہریوں کو گھروں میں ہی محصور کردیا ہے جس کے نتیجے میں عام زندگی مفلوج ہوگئی ہے۔ رپورٹوں کے مطابق بعض علاقوں میں سڑکوں پر پانی جمع ہوجانے سے ٹریفک نظام بھی درہم برہم ہوگیا ہے۔