بھٹکل میں اژدھےکو ساتھ لے کرزخمی شخص پہنچا سرکاری اسپتال
بھٹکل 21/جون (ایس او نیوز) زخمی حالت میں ایک شخص اپنے ہی ہاتھ کو ڈسنے والے اژدھے کو زندہ پکڑ کر اسپتال پہنچ گیا، یہ واردات جمعہ کی رات قریب دس بجے پیش آئی۔
زخمی شخص کی شناخت پورورگا کے رہنے والے وینکٹ رمن نائک کی حیثیت سے کی گئی ہے ، جسے سرکاری اسپتال میں ابتدائی طبی امداد کے بعد پرائیوٹ اسپتال منتقل کیا گیا ہے۔
شہر میں گذشتہ ایک ہفتہ سے جاری بارش کی وجہ سے جگہ جگہ پر پانی جمع رہتا ہے، ایسے میں چوتنی ندی کے قریبی راستہ پر بھی گڑھوں میں جابجا پانی جمع تھا اور اُسی میں ایک اژدھا رینگتا ہوا نظرآرہا تھا۔ راہ چلتے وینکٹ رمن نے جب اژدھا کو دیکھا تو یہ سوچ کر کہ یہ اژدھا کسی بھی راہ چلتے شخص پر اچانک حملہ کرسکتا ہے اور لوگ اژدھے کی زد میں آکر زخمی ہوسکتے ہیں، اپنے چند دوستوں کی مدد سے اُسے پکڑنے کی کوشش کی، مگر اس کوشش میں اژدھے نے وینکٹ رمن پر ہی حملہ کردیا اور اُس کے ایک ہاتھ کو ڈس لیا۔ مگر اس نے ہمت نہیں ہاری اور اژدھے کو اُسی وقت پکڑ لیا اوراپنے دوستوں کی مدد سے زندہ اژدھا کو ساتھ لے کر ہی سرکاری اسپتال پہنچ گیا۔
اطلاع ملتے ہی محکمہ جنگلات کے آفسران سرکاری اسپتال پہنچے اور اژدھے کو اپنے قبضے میں لے لیا ، بتایا گیاہے کہ بعد میں محکمہ کے لوگوں نے اژدھے کو دور جنگل میں لے جاکر چھوڑ دیا ہے۔
وینکٹ رمن کے ہاتھ کی مرہم پٹی کرائی گئی ہے اورپرائیویٹ اسپتال میں اس کا علاج جاری ہے۔