بھٹکل،یکم ستمبر (ایس او نیوز) ضلع کے ایک معروف کنڑا اخبار میں 28اگست کوایک مضمون شائع ہوا ہے جس میں دہشت گردی سے متعلق سرگرمیوں میں سوشیل ڈیموکریٹک پارٹی آف انڈیا اور دیگرتنظیموں کے  ملوث ہونے کا شبہ ظاہر کیا گیا ہے اور بتایا گیا ہے کہ ملک کی سب سے بڑی خفیہ ایجنسی ’را‘ کے افسر ان اس سلسلے میں تحقیقات کے لئے سرسی پہنچ گئے ہیں۔اور ایس ڈی پی  اور دیگر تنظیموں کی سرگرمیوں پر پولیس کی طرف سے نگاہ رکھی جارہی ہے۔

اس رپورٹ کو  ہتک آمیز اور اشتعال انگیز قرار دیتے ہوئے ایس ڈی پی آئی  بھٹکل تعلقہ یونٹ کے صدر وسیم منیگار نے بھٹکل ٹاؤن پولیس اسٹیشن میں شکایت درج کروائی ہے۔ انہوں نے اپنی شکایت میں کہا ہے کہ کنڑا اخبار کے اس مضمون میں ’را‘ کے افسر ان تحقیقات کے لئے سرسی پہنچنے اور پولیس کی طرف سے ایس ڈی پی آئی اور کچھ دیگر تنظیموں کی خصوصی نگرانی کرنے اور ان کی سرگرمیوں کو دہشت گردانہ کارروائیوں سے جوڑنے کی کوشش کی گئی ہے جو  انتہائی اشتعال انگیز ہے۔ یہ ایس ڈی پی آئی کو بدنام کرنے کے علاوہ براہ راست مسلمانوں اور ہندوؤں کے درمیان تفریق، دشمنی اور نفرت کا ماحول پیدا کرنے کی کوشش ہے۔ اس مضمون کے ذریعے گویا  فرقہ وارانہ فسادات پر اکسانے کا کام کیا جارہا ہے۔اس سے فرقہ وارانہ ہم آہنگی کو سخت دھچکہ لگنے اور سماج میں بدامنی پھیلنے کے امکانات ہیں۔ تحریری شکایت میں وسیم منیگار نے  پولیس سے  مطالبہ کیا  ہے کہ اس اخبار کے ایڈیٹر اور رپورٹر کے خلاف معاملہ درج کرتے ہوئے سخت قانونی کارروائی کی جائے۔