بھٹکل ،28؍فروری (ایس او نیوز) مرڈیشور کے ساحل پر سیر و تفریح کے دوران سمندر میں ڈوب رہے ایک ہی خاندان کے تین افراد کو مقامی افراد نے بچا لیا۔

    بتایا جاتا ہے کہ یہ لوگ بنگلورو سے سیاحت کے لئے مرڈیشور پہنچے تھے۔ ایک ہی خاندان کے پانچ افراد جب تیرنے کے لئے  سمندرمیں اترے تو ان میں سے تین لوگ تیز لہروں میں بہہ گئے۔ یہ دیکھ کر اوشئین ایڈوینچرس گروپ سے تعلق رکھنے والےسنجیوہری کانت، چندرا شیکھر دیواڈیگا نے فوراً کارروائی کی اور اپنی کشتی لے کر ڈوبتے ہوئے سیاحوں کے پاس پہنچ گئے اور سنجن(15سال)،کملما   (40 سال)اورسنجئے (19سال) کی جان بچاتے ہوئے انہیں بحفاظت کنارے پر لانے میں کامیاب ہوگئے۔

    مقامی لوگوں کا کہنا ہے کہ مرڈیشور میں ہر سنیچر اور اتوار کے دن بہت بڑی تعداد میں سیاح سیر و تفریح کے لئے ساحل پر جمع ہوتے ہیں۔ پھر یہ لوگ سمندر میں تیرنے یا موجوں سے کھیلنے میں مصروف ہوجاتے ہیں ۔ ایسے میں اکثر و بیشتر سیاحوں کے بہہ جانے یا ڈوبنے کے واقعات پیش آتے ہیں۔ لیکن سرکاری انتظامیہ کی جانب سے کوئی حفاظتی انتظام نہیں کیا گیا ہے۔ یہاں پر لائف گارڈز کو بھی تعینات نہیں کیا گیا ہے۔ اس وجہ سے سیاحوں کے ساتھ حادثہ پیش آنے یا غرقابی کا معاملہ پیش آنے پر ان کی جان بچانا ایک دشوار مسئلہ بن جاتا ہے۔ ایسے مواقع پر مقامی ماہی گیر یا پھر ایڈوینچر کمپنی کے ملازمین ہی لائف گارڈز کا رول ادا کرتے ہیں۔ اس لئے مقامی لوگوں نے مطالبہ کیا ہے کہ ضلع کے اہم ساحلی کناروں پر فوراً لائف گارڈز کو تعینات کرنے کی کارروائی پوری کی جائے۔