نئی دہلی،15؍اپریل (ایس او نیوز؍یو این آئی) کانگریس جنرل سکریٹری پرینکا گاندھی واڈرا نے لاک ڈاؤن کے دوسرے مرحلے کے پہلے دن وزیر اعظم نریندر مودی کی سخت نکتہ چینی کرتے ہوئے بدھ کے روز کہا کہ وہ غریب کو ذہن میں رکھ کر فیصلے نہیں لیتے جس سے ہر بار غریبوں کو ہی گہری چوٹ پہنچتی ہے۔

پرینکا گاندھی نے ٹوئٹ کیا ’’آخر ہر بار ہر مصیبت غریبوں اور مزدوروں پر ہی کیوں آتی ہے۔ ان کے حالات کو ذہن میں رکھ کر فیصلے کیوں نہیں لئے جاتے۔ انہیں بھگوان بھروسے کیوں چھوڑ دیا جاتا ہے۔ لاک ڈاؤن کے دوران ریلوے ٹکٹوں کی بکنگ کیوں جاری تھی۔ ان کے لئے خصوصی ٹرینوں کا انتظام کیوں نہیں کیا گیا۔‘‘

انہوں نے کہا کہ ’’ان کے پیسے ختم ہو چکے ہیں، اکٹھا کیا گیا راشن ختم ہو رہا ہے، وہ اپنے کو غیر محفوظ محسوس کر رہے ہیں، گھر گاؤں جانا چاہتے ہیں۔ اس کے انتظامات ہونے چاہیے تھے۔ ابھی بھی درست پلاننگ کے ساتھ ان کی مدد کا انتظام کیا جا سکتا ہے۔ مزدور اس ملک کی ریڑھ کی ہڈی ہیں۔ نریندر مودی جی بھگوان کے لئے ان کی مدد کیجیے۔‘‘

اس سے قبل پرینکا گاندھی نے اتر پردیش کے وزیر اعلیٰ یوگی آدتیہ ناتھ کو خط لکھ کر ٹیسٹنگ بڑھانے کی گزارش کی تھی۔ انہوں نے اپنے ٹوئٹ میں کہا تھا، ’’میں نے یو پی کے وزیر اعلیٰ کو خط لکھ کر ٹیسٹنگ بڑھانے کی گزارش کی ہے۔ یو پی میں ہونے والی اموات میں 5 افراد کی کرونا ٹیسٹ رپورٹ بعد میں آئی۔‘‘

انہوں نے مزید لکھا، ’’ٹیسٹنگ کا نظام تاحال انتہائی ناقص ہے۔ ٹیسٹ کا نظام تیز اور منظم کیجیے۔ زیادہ سے زیادہ جانچ ہی صحیح تصویر پیش کر سکتی ہیں۔‘‘