مینگلور کے قریب الال میں کروڑوں روپے مالیت کے سامان کے ساتھ ڈوب رہا ہے کارگو جہاز 'پرنسیس میرال' ؛ جہاز پر سوار ممبران کو انڈین کوسٹ گارڈس بچانے میں کامیاب
منگلورو 23 / جون (ایس او نیوز) لبنان سے ملیشیاء کے لئے اسٹیل کوائلس لےجانے والا کارگوجہا' پرنسیس میرال' جو الال کے قریب سمندر میں پھنس گیا تھا اب وہ پوری طرح سمندر میں غرقاب ہونے کی حالت میں آ گیا ہے ، مگر اسے بچانے کی کوششیں اب بھی جاری ہیں ۔
ترکی کے باشندے کی ملکیت والا اس کارگو جہاز 'پرنسیس میرال' میں کچھ تیکنکی خامی کی وجہ سے سوراخ پیدا ہو گیا تھا اور جہاز چلانے والی کمپنی کے ایجنٹ نے اسے مرمت کے لئے نیو منگلورو پورٹ کے اندر لانے کی کوشش کی ، لیکن اسے اجازت نہیں دی گئی ۔ اس دوران کوسٹ گارڈس جہاز پر موجود 15 کے قریب شامی عملہ کو اپنی تحویل میں لے لیا اور جہاز کو سمندر میں چھوڑ دیا گیا ۔ بعد میں ان مزدوروں کو پانمبور پولیس اسٹیشن کے حوالہ کیا گیا جہاں سے انہیں بنگلورو میں واقع غیر ملکیوں کے ڈیٹنشن سنٹر میں بھیج دیا جائے گا اور پھر وزارت خارجہ کی طرف سے اجازت ملنے کے بعد انہیں واپس ان کے ملک شام بھیجا جائے گا ۔
معلوم ہوا ہے کہ اس وقت الال سمندر میں موجود 'پرنسیس میرال' پر جو اسٹیل کوائلس لدے ہوئے ہیں اس کی مالیت کروڑوں روپے بتائی جارہی ہے اس لئے جہاز کا مالک کم از کم مال کو بچانے کی جد وجہد میں لگا ہوا ہے ۔ وہ لگاتار مارکن شپنگ ایجنسی منگلورو کے نمائندوں کے ساتھ رابطہ میں ہے ۔ جہاز کو بچانے کے لئے ماہرین کو ممبئی میں واقع 'اسمتھ سالویج کمپنی' سے آنا ہے ۔ مگر جہاز کو ڈوبنے سے بچانے کے آثارمعدوم ہوتے جارہے ہیں کیونکہ اب تک جہاز 70 فیصد تک ڈوب چکا ہے اورسمندر کی لہروں میں تیزی آتی جارہی ہے ۔