نئی دہلی : این ڈی اے کی صدارتی امیدوار درو پدی مرمو جمعرات کو ہندوستان کی 15 ویں اور اولین قبائلی صدر جمہور منتخب ہوگئیں ۔ 64 سالہ مرموکو دوسری خاتون صدر بننے کا اعزاز بھی حاصل ہوا ہے ۔انہوں نے زائداز 64 فیصد قابل قبول ووٹ حاصل کئے ۔ ووٹوں کی گنتی کاعمل 10 گھنٹے سے زیادہ چلا جس میں ایم پیز اور ایم ایل ایز کے بیالٹس کی رائے شماری کی گئی ۔ اس عمل کے اختتام پر ریٹرننگ آفیسر پی سی مودی نے دروپدی مرموکو فاتح قرار دیا جنہیں 76,803 ,6 ووٹ حاصل ہوۓ جبکہ اپوزیشن امیدوار یشونت سنہا کو 3,80,177 ووٹ ملے.
دروپدی مرمو صدارتی عہدہ پر رامناتھ کووند کی جانشین بنی ہے ۔ وزیر اعظم نریندرمودی نے صدارتی انتخاب کے اعلان کے تھوڑی دیر بعد تین مورتی مارگ پہنچ کر منتخب صدر جمہور یہ در و پدی مرمو سے ملاقات کی اور انہیں مبارکباد پیش کی ۔اس موقع پر صدر بی جے پی جگت پرکاش نڈا موجود تھے۔
دروپدی مرمو پہلی آدی واسی اور دوسری خاتون ہیں جو قوم کی اولین شہری اور ہندوستان کے مسلح افواج کی سپریم کمانڈر بن گئی ہیں ۔ ماضی میں پر تبھا پاٹل نے پہلی خاتون صدر جمہوریہ بننے کا شرف حاصل کرچکی ہیں ۔ مرمو 2000 اور 2004 ء میں اڈیشہ اسمبلی میں دو میعادوں کیلئے منتخب ہوئیں ۔انہوں نے چیف منسٹر نوین پٹنائک کی بی جے ڈی ۔ بی جے پی مخلوط حکومت میں 2000ء سے 2004 ء تک ریاستی وزیر کی حیثیت سے خدمات انجام دے چکی ہیں۔2015ء میں وہ جھارکھنڈ کی پہلی خاتون گورنر بنی تھیں ۔ ملک اور بیرون ملک سے منتخب صدرمرموکو مبارکبادی کا سلسلہ شروع ہو گیا ہے۔