بھٹکل 14 جنوری (ایس او نیوز)   پارلیمانی انتخابات جیسے جیسے قریب آرہے ہیں،  بعض پارٹیوں کی طرف سے   عوام میں  نفرت پھیلانے اور انتشار پیدا کرنے کی کوشش شروع ہوگئی ہے۔ اسی طرح کا ایک واقعہ  تعلقہ جالی پٹن پنچایت حدود کے  دیوی نگر میں واقع مسجد کے سامنے پیش آیا جب بعض لوگوں نے "دیوی نگر"   لکھے ہوئے بورڈ کے ساتھ چھیڑ چھاڑ کرنے کی  کوشش کی  جس پر اقلیتی  برادری کے ذمہ داران نے فوری پولس کو واقعے کی جانکاری دی۔

اطلاع ملتے ہی بھٹکل مضافاتی پولس جائے وقوع پر پہنچ گئی۔  اس موقع پر  دونوں فرقوں کے کافی نوجوان جمع ہوجانے سے کچھ  دیر کے لئے حالا ت کشیدہ ہوگئے۔

  اقلیتی برادری کے لوگوں کا کہنا ہے کہ مخالف برادری کے  بعض لوگوں نے  بورڈ   کے  ساتھ چھیڑ چھاڑ کرنے کے ساتھ  وہاں ایک بینر لگانے کی کوشش کی تھی، مگر  مخالف برادری کے لوگوں نے بتایا کہ  وہ بورڈ کو  نئے سرے سے لکھنے کے لئے  اُس پر پینٹ لگارہے تھے تاکہ نئے سرے سے وہاں  "دیوی نگر"  لکھ سکیں۔ بہر حال پولس کے جائے وقوع پر پہنچنے کے بعد  دیوی نگر کے بورڈ کو نئی پینٹنگ کے ساتھ  دوبارہ   تحریر کیا گیا ہے۔

جائے وقوع پر پولس کی ٹُکڑی  لگائی گئی ہے اور حالات زیر قابو ہے۔