منگلورو 5/ اپریل (ایس او نیوز) منگلورو انٹرنیشنل ایئر پورٹ کا انتظام و انصرام آدانی گروپ کو سونپنے کے بعد اس کے داخلی داروازے پر آدانی ایئر پورٹ کا بورڈ لگا دیا گیا ہے۔ جبکہ شروع دن سے مقامی لوگ اس کی مخالفت کر رہے ہیں۔ لیکن اب نام بدلے جانے پر مخالفین کی طرف سے عدالت کا دروازہ کھٹکھٹانے کی تیاریاں کئے جانے کی اطلاعات موصول ہوئی ہیں۔
خیال رہے کہ اس ایئر پورٹ کو آدانی گروپ کے ہاتھوں میں دینے اور اس کا نام بدلنے کے خلاف ساحلی علاقے میں بڑے پیمانے پر آواز اٹھائی گئی تھی مگر مرکزی حکومت نے اسے درکنار کرکے ایئر پورٹ نجی کمپنی کی تحویل میں دینے کی کارروائی پوری کردی تھی۔
ویسے اس ایئر پورٹ کے نام کو لے کر بھی ایک الگ تنازعہ چل رہا تھا جس میں دو تین الگ الگ مشہور شخصیات سے منسوب کرنے کا مطالبہ ہورہا تھا اورمہمیں چلائی جارہی تھیں۔ ان سب میں سب سے پرزور مطالبہ تُلو ناڈو کے ایک افسانوی کردار کوٹی چینّیا کے نام کا رہا ہے۔
معلوم ہوا ہے کہ اس ائیر پورٹ کو آدانی ایئر پورٹ کا نام دئے جانے کے خلاف مہم چلانے والوں نے ایئر پورٹ اتھاریٹی آف انڈیا سے شکایت کی تھی اور کہا تھا کہ ایئر پورٹ کا نام تبدیل کرنا قانون کی خلاف ورزی ہے۔ اس پر کارروائی کرتے ہوئے ایئر پورٹ اتھاریٹَی نے منگلورو ایئر پورٹ کو نوٹس جاری کیا ہے۔
اب نام بدلنے کے خلاف مہم چلانے والوں نے عدالت میں مفاد عامہ کی عرضی داخل کرنے کی تیاری شروع کی ہے جس کے تحت قانونی ماہرین سے صلاح و مشورہ کیا جارہا ہے۔