منڈگوڈ 27؍مارچ (ایس او نیوز) پارلیمانی الیکشن کے پیش نظر الیکشن کمیشن کی ہدایات کے مطابق ریاست میں بلدیاتی چیف افسران کی حیثیت سے تعینات اسامیوں کا تبادلہ ریاستی حکومت نے مختلف مقامات پر کردیا ہے۔

ضلع شمالی کینرا میں یلاپور، منڈگوڈاورہلیال کے چیف افسران کا تبادلہ کیا گیا ہے۔پتہ چلا ہے کہ منڈگوڈ اور ہلیال کے لئے نئے چیف افسران کو تعینات کیا گیاہے لیکن یلاپور پٹن پنچایت کے لئے ابھی کسی کاتقرر چیف آفیسر کی حیثیت سے نہیں ہوا ہے ۔

اس کے علاوہ ضلع میں تین سال سے زیادہ عرصے سے اربن ڈیولپمنٹ محکمے میں اسسٹنٹ ایکزیکٹیو انجینئر کے عہدے پر فائز آر پی نائک کا تبادلہ جنوبی کینرا ضلع میں اسی عہدے پر کیے جانے کے احکامات جاری ہوئے تھے۔ مگرمعلوم ہوا ہے کہ آر پی نائک کے سلسلے میں الیکشن کمیشن کو بہت ساری شکایات ملنے کے بعدضلع ڈپٹی کمشنر نے23مارچ سے انہیں اپنے عہدے سے ہٹا کر اگلی کارروائی کے لئے انہیں بنگلور و کے اربن ڈیولپمنٹ ڈپارٹمنٹ کے سیکریٹری کے دفتر میں حاضر ہونے کے احکام جاری کیے ہیں۔