بینگلورو 30 / اکتوبر (ایس او نیوز) آن لائن دھوکہ دہی کے ایک نئے معاملے میں فریب کاروں نے پارسل میں منشیات موجود ہونے کی بات کہتے ہوئے بینگلورو کی ایک خاتون کو 13 لاکھ روپے کا چونا لگا دیا اور سب سے اہم بات یہ ہے کہ اُس خاتون نے کوئی پارسل بھیجا بھی نہیں تھا ۔

میڈیا رپورٹ کے مطابق  بینگلورو کے وکٹوریا لے آوٹ میں رہنے والی ایک خاتون کو ایک جعلساز نے فون کرکے بتایا کہ وہ ممبئی کی کوریئر کمپنی کا ایکزیکٹیو ہے اور خاتون نے جو تھائی لینڈ کے لئَے پارسل بھیجا ہے اس میں 140 گرام ایم ڈی ایم اے نشے کی گولیاں، آٹھ پاسپورٹس اور پانچ کریڈٹ کارڈس موجود ہیں ۔ خاتون نے جواب دیا کہ اس نے کوئی بھی پارسل نہیں بھیجا ہے ۔ اس پر جعلساز نے اس خاتون کا آدھار کارڈ نمبر بتاتے ہوئے کہا ہے کہ پارسل اسی نے بھیجا ہے اور کسٹمس والوں نے پارسل ضبط کر لیا ہے اور انہیں اب ممبئی سائبر کرائم پولیس سے رابطہ قائم کرنا ہوگا ۔

    یہ سن کر خاتون خوفزدہ ہوگئی ۔ اس کے بعد دھوکے بازوں نے اسے نجی تفصیلات درج کرنے کے لئَے اسکائپ ایپ ڈاون لوڈ کرنے کی ہدایت دی اور پھر ایک اکاونٹ نمبر دیا جس پر رقم ٹرانسفر کرنے کو کہا گیا ۔ دوسرے دن خاتون نے بینک جا کر دھوکے بازوں کے فراہم کردہ اکاونٹ میں 13 لاکھ روپے ٹرانسفر کر دئے ۔ جیسے  ہی رقم دھوکے بازوں کے کھاتے میں منتقل ہوگئی انہوں نے اپنے بینک کھاتے کی تمام تفصیلات مٹا دیں اور رابطہ منقطع کر دیا ۔ 

    آن لائن فراڈ کا شکار ہوئی اس خاتون نے اب پولیس کے پاس شکایت درج کروائی ہے ۔