اڈپی،  7 / اپریل (ایس او نیوز) اڈپی - چکمگلورو سیٹ پر پارلیمانی الیکشن کے لئے پرچہ نامزدگی داخل کرنے کی آخری تاریخ گزرنے کے بعد جانچ پڑتال کے دوران تین آزاد امیدواروں کے پرچے مسترد ہوگئے جس کے بعد باضابطہ طور 10 امیدوار مقابلے کے لئے اہل قرار دئے گئے ۔ 
    
اس حلقے میں پرچہ نامزدگی داخل کرنے کی آخری تاریخ 5 اپریل تھی جبکہ پرچہ واپس لینے کی آخری تاریخ 8 اپریل ہے ۔ ریٹرننگ آفیسر و ضلع ڈپٹی کمشنر ڈاکٹر ودیا کماری کی جانب سے جاری کیے گئے بیان کے مطابق اس مرتبہ جملہ 13 افراد نے بطور امیدوار اپنے پرچے داخل کیے تھے جن میں سے تین آزاد امیدوارں کے پرچے ضابطے کے مطابق درست نہ ہونے کی وجہ سے مسترد کر دئے گئے ۔ اس وقت کانگریس پارٹی کے جئے پرکاش ہیگڑے، بی جے پی کے کوٹا سرینواس پجاری کے علاوہ دو آزاد امیدواروں سمیت بہوجن سماج پارٹی، جن ہیتا پارٹی جیسے دیگر چھوٹی چھوٹی پارٹیوں کے جملہ 10 امیدواروں کے نام مقابلے کی فہرست میں شامل ہیں ۔