کاروار 16؍اپریل (ایس او نیوز) ضلع شمالی کینرا کے بی جے پی امیدوار کے لئے انتخابی مہم چلانے کے لئے وزیر دفاع نرملاسیتا رامن کاروار پہنچی اور انتخابی ریالی سے خطاب کرتے ہوئے کانگریس اور یو پی اے سرکار کی ناکامیوں اور مودی سرکارکی کامیابیوں کی جھڑی لگادی۔

کانگریس کو خاص طور پر بدعنوانی اور پاکستان کے ساتھ دہشت گردی کے معاملے پر نرم رویہ اور کم ہمتی دکھانے کا الزام لگاتے ہوئے کہا ممبئی دہشت گردانہ حملے کے بعد ہتھیار بند پاکستانی دہشت گرفتار ہوگیا تھا اور ہماری فوج پاکستان پر حملہ کرنے کے لئے تیار تھی، لیکن اس وقت کی یوپی اے حکومت نے صرف ثبوت اکٹھا کرنے کے نام پر وقت گنوادیا۔ جبکہ مودی حکومت نے اوری اور پلوامہ حملوں کا بدلہ پاکستان کی سرحدوں میں گھس کر لیا۔آگسٹا ویسٹ لینڈ ہیلی کاپٹر میں ہوئی بدعنوانی میں کانگریس اور گاندھی خاندان کو راست طور پرملوث بتاتے ہوئے کہا کہ گزشتہ پانچ برسوں میں مودی حکومت نے بہت سارے بدعنوان لوگوں کو جیل کے پیچھے بھیج دیا ہے اور آئند ہ پانچ برسوں میں مزید بہت سے لوگ جیل کی سلاخوں کے پیچھے جانے والے ہیں۔

وزیر دفاع نے مزید کہا کہ کانگریس والے ہم پر الزام لگاتے ہیں کہ ہم فوج کے کارناموں کو اپنے مفاد کے لئے استعمال کررہے ہیں ، جبکہ ہم لوگوں نے کبھی بھی ایسا نہیں کیا ہے۔مودی سرکار نے توفوج کو مزید طاقتور بنایا ہے۔نرملا سیتارامن نے الٹے کانگریس پر پلٹ وار کرتے ہوئے کہا کہ کرناٹکا میں کانگریس کے ایک سابق وزیر تاریخ لکھ رہے ہیں اور اس میں انہوں نے فوج کی بڑی ہتک کی۔ انہوں نے ایئر چیف کو جھوٹا اور آرمی کو سڑک کے غنڈے قراردیا ہے۔ نرملا سیتا رامن نے اس انتخاب میں بی جے پی او رمودی کی کامیابی کا یقین دلاتے ہوئے کہا کہ 2047میں بھارت کی آزادی کو سوسال مکمل ہو جائیں گے اور اس وقت ہمارا ملک ایک ترقی پزیر ملک نہیں بلکہ پوری طرح ترقی یافتہ ملک بن جائے گااور اسی سمت میں مودی سرکار کام کررہی ہے۔