بھٹکل:28؍جولائی  (ایس اؤ نیوز)تربیت ایجوکیشن سوسائٹی بھٹکل کی نیو شمس اسکول میں ’ یوم ِ ماحولیات ‘ کی مناسبت سے اتوار کو ’’این ویرو واک ‘‘(Enviro Walk) نامی پروگرام کا انعقاد کرتےہوئے ماحولیات کے تحفظ کو لے کر عوامی بیداری پیدا کرنےکی کوشش کی گئی ۔

اسکول کی صدر مدرسہ فہمیدہ ڈاٹا نے پروگرام کو ہری جھنڈی دکھانے کے بعد خطاب میں کہاکہ عالمی سطح پر ماحولیات کو  برباد کیا جارہاہے، اس کا ازالہ ہمارے اپنے گھروں سے ہونا چاہئے ، ہماری روز مرہ زندگی میں پلاسٹک اشیاء کا استعمال نہ کریں اس کابائیکاٹ کرتے ہوئے صاف ستھرا اور خوبصورت ماحول کی تعمیر کرنا ہمارے ہرایک طلبا کا مقصد ہونا چاہئے۔

اس کے بعد اسکول صحن سے ’ہمارا قدم ماحولیات کی طرف ‘، پلاسٹک کا استعمال ختم کریں ،ماحولیات کو تحفظ بخشیں ‘ جیسے نعروں کے ساتھ طلبا پر مشتمل ’ماحولیاتی قدم ‘( Enviro Walk) کے موضوع کے تحت ماحولیاتی تحفظ کی عوامی بیداری ریلی کی شروعات ہوئی۔ ریلی کے دوران جامعہ آباد کے ہر ایک گھر پر دستک دیتے ہوئے انہیں ایک ایک درخت تقسیم کرکے ماحولیاتی شعور بیدار کرنے کی کوشش کی گئی ۔ وہاں سے شمس الدین سرکل پہنچ کر پلے کارڈ،بیانر کی تشہیر کرتے ہوئے ماحولیات کے حق میں نعرے لگائے گئے۔یہاں  رپورٹر پرسنا بھٹ کو ادارے کے صدر محمد اسماعیل محتشم نے درخت کا تحفہ دیا۔ اسکول کے صدر مدرس ایم آر مانوی نے ماحولیات پر اپنے خیالات کا اظہار کیا۔ اس موقع پر ادارے کے جنرل سکریٹری مولانا ضیاء الرحمن ندوی، پی آر اؤ سکریٹری مولانا عزیز الرحمن ندوی ، انتظامیہ ممبر ایس کے صلاح الدین، عبدالمنیم رکن الدین ، اساتذہ میں سے مولانا سبحان ندوی ، شازیر حسین ، منجوناتھ ہیبار، عبدالربیع  خلیفہ ، ایس ایم ثقلین ، سید شجاع وغیرہ موجود تھے۔ اس کے بعد اسکول صحن میں ادارے کے نائب صدر قادرمیراں پٹیل سمیت کئی عہدیداران ، ممبران ، اساتذہ وغیرہ کی موجودگی میں  طلبا نے اسکول کے اطراف شجر کاری  کرتےہوئے ماحولیات کےمتعلق عملی کام انجام دیا۔