اُڈپی 13 / فروری (ایس او نیوز) پوری ریاست میں سنسنی کی لہردوڑانے والی نیجارقتل کی وردات کے ملزم پروین چوگلے کے خلاف تحقیقاتی افسراور ملپے پولیس سرکل انسپکٹر کرشنا ایس کے نے عدالت میں 2,202 صفحات پر مبنی چارج شیٹ داخل کردی ہے۔
خیال رہے کہ نیجارکے تُرپتی لے آوٹ میں رہائش پزیر نورمحمد کی بیوی حسینہ (48 سال)، ان کی بیٹی افنان (23 سال)، آئناز(21 سال) اور ان کے بیٹے عاصم (13سال) کو 12 نومبر 2023 کے دن صبح کے وقت ان کے اپنے گھر میں پروین چوگلے نامی شخص نے قتل کردیا تھا جبکہ نور محمد کی ساس ہاجرہ (70 سال) اس واردات میں سخت زخمی ہوگئی تھیں۔ اس معاملے میں چارج شیٹ داخل کرنے کی معینہ مدت کا کل 12 فروری آخری دن تھا۔
اُڈپی کے سپرنٹنڈنٹ آف پولیس ڈاکٹر کے ارون نے بتایا کہ چیف سِوِل جج اینڈ جے ایم ایف سی عدالت میں تحقیقاتی افسرنے اسپیشل پبلک پراسیکیوٹرکے مشورے سے چارج شیٹ داخل کی ہے اس میں تکنیکی ثبوت، خصوصی ماہرین کی رپورٹ، عوام کے بیانات پر مبنی گواہی سمیت جملہ 244 ثبوت شامل کیے گئے ہیں۔ اس کے علاوہ اس معاملے کی سماعت جلد شروع کرنے کے لئے پولیس کی طرف سے عدالت سے درخواست کی گئی ہے۔
اسپیشل پبلک پراسیکیوٹر شیوپرساد الوانے بتایا کہ 15فروری کوچارج شیٹ کے دستاویزات کا معائنہ مکمل ہوگا اور اس کی نقل ملزم کے وکیل کو سونپی جائے گی۔ اس کےعلاوہ سماعت کے لئے یہ کیس اڈپی چیف اینڈ ڈسٹرکٹ سیشنس کورٹ کو منتقل کیے جانے کی توقع ہے۔ اس دن اگراہارجیل بینگلورو میں قید ملزم کو ویڈیو کانفرنسنگ کے ذریعے عدالت میں حاضر کیا جائے گا۔