بھٹکل 19/اگست (ایس او نیوز)  تعلقہ کے سیاحتی مقام مرڈیشور کے ایک ہوٹل میں  بنگلور کے ایک سیاح کی نعش پنکھے سے لٹکتی ہوئی پائی گئی جس کی شناخت بنگلور کے مضافاتی علاقہ ہوسکوٹے کے رہنے والے کرشنا مورتی (38) کی حیثیت سے کی گئی ہے۔

پولس ذرائع سے ملی اطلاع کے مطابق  کرشنا مورتی 16/اگست کی صبح 4:30 بجے مرڈیشور کے ایک لاڈج پہنچا تھا، اگلے روز 17 اگست کو اُسے روم سے باہر نکلتے نہیں دیکھا گیا، 18/اگست کی صبح جب ہوٹل کے وارڈ بوائے نے صفائی کے لئے  اس کے کمرے  میں دستک دی تو جواب موصول نہیں ہوا، شک کی بنیاد پر اس نے  کمرے میں جھانکنے کی کوشش کی تو پتہ چلا کہ  کرشنا مورتی کمرے کے اندر پنکھے سے لٹکا ہوا ہے۔

ہوٹل کے  ذمہ داران نے فوری مرڈیشور پولس کو واقعے کی جانکاری دی اور پولس نے جائےوقوع پر پہنچ کر نعش کو اپنے قبضے میں کرتے ہوئے چھان بین شروع کی۔

پولس نے بنگلور میں  کرشنا مورتی کے گھروالوں کو  واقعے کی جانکاری دی ہے اور اُن کے مرڈیشور پہنچنے کے انتظار میں ہے، جس کے بعد پوسٹ مارٹم و دیگر کاروائی انجام دی جائے گی۔

مرڈیشور پولس تھانہ میں خودکشی کے تعلق سے  معاملہ درج کیا گیا ہے اور مزید چھان بین جاری ہے۔