منڈگوڈ:20/اگست (ایس اؤنیوز)اترکنڑا ضلع ڈپٹی کمشنر ایس ایس نکول نے سنیچر کو منڈگوڈ پٹن پنچایت کا دورہ کرتے ہوئے مختلف شعبہ جات کی حاضری و دفاتری فائلس کا معائنہ لینے کے بعد اُن عملہ کو آڑے ہاتھ لیا عملہ پابندی کے ساتھ کام نہیں کررہے تھے انہوں نے کام میں لاپروائی برتنے والے عملہ کو تاکید کی کہ وہ صحیح ڈھنگ سے کام کریں۔
کچرانکاسی شعبہ کے نگراں کار سوم شیکھر اکیّ کے رویہ سے بے حد ناراض ہوکر ڈی سی نے کہا کہ تمہیں تنخواہ دینا ہی بے کار ہے ، ایک کام ڈھنگ کا نہیں ہے، تم جو جانکاری دے رہے ہو اسی سے ظاہر ہوتاہے کہ کسی اور کے ذریعے کئے گئے کام پر اپنا کریڈٹ لے رہے ہو، انہوں نے سوم شیکھرا سے کہا کہ اُس کی پیش کردہ رپورٹ ٹھیک نہیں ہے ، بعد میں عملے کے غلط رویے کو دیکھتے ہوئے انہیں معطل کرنےکافیصلہ سنایا۔ ڈپٹی کمشنر نے اس موقع پر پینے کے پانی کے مسئلہ کو لے کر بھی گفتگو کی ۔
اسی طرح شہری ترقی جات آفیسر آر پی نائک نے شہر کے رہائشی کامپلکس سے کچراجمع کرنے اور ان سے فیس وصول کرنےکے متعلق پنچایت عملے سے سوال کیاتو پنچایت میں سناٹا چھا گیا۔عملہ ایک دوسرے کا منہ دیکھنےلگا، اس موقع پر ڈپٹی کمشنر نے پنچایت کو سخت ہدایات جاری کرتے ہوئے کہاکہ کلیان منٹپ، رہائشی کامپلکس اور ہوٹلوں سے زائد فیس وصول کرنےکے لئے میٹنگ میں قرارداد پاس کریں۔ جائزے کے دوران پتہ چلا کہ تجارتی کامپلکس کا گذشتہ 4مہینوں سے 2.19لاکھ روپئے کرایہ باقی ہے ، اس پر ڈپٹی کمشنر ایس ایس نکول نے سرکاری عملے کو کھری کھری سناتے ہوئے کرایہ وصول نہ کرنے کی وجوہات طلب کی، انہوں نے سختی کے ساتھ کہا کہ اگر دکاندار کرایہ نہیں دے رہے ہیں تو اُن دکانوں میں قفل لگادو، اعلامیہ کے ذریعے دوسروں کو وہ دکان کرایہ پر دو۔
ڈپٹی کمشنر نے گذشتہ ایک سال سے غیر قانونی طورپر غیر حاضر سکینڈ ڈویزن کلرک پربھا کر رواجی کو فوری معطل کرنے کا حکم جاری کرنےکی ہدایت دی۔
جائزہ میٹنگ کے بعد شہر کے نواحی علاقے میں کچرا نکاسی مرکز کا دورہ کیا تو کچا کچرا اور سوکھا کچرا ایک ہی جگہ پر جمع کرکے ذخیرہ کرکے رکھنے پر ڈی سی نکول نے حیرت کیا۔ یہ دیکھتے ہی پھر کچرانکاسی نگراں کا ر کو آڑے ہاتھوں لیتے ہوئے کچے اور سوکھے کچرے کو الگ الگ جمع کرنےکی تاکید کی۔ ڈپٹی کمشنر نے بعد میں متنبہ کیا کہ 10ستمبر تک اگر سب کچھ ٹھیک نہیں ہوا تو پھر وہ اس پر تادیبی کاروائی کریں گے۔ اس موقع پر پٹن پنچایت صدر رفیق انعامدار، نائب صدر پکیرپا انٹال، چیف آفیسر سنگن بسیا، رابرٹ لوبو سمیت دیگر ممبران وغیرہ موجود تھے۔