کاروار: سی برڈ بحری اڈے کا جائزہ لینے کل پہنچ رہی ہے راہل گاندھی، شرد پوار سمیت کئی اہم اراکین پارلیمان کی کمیٹی
کاروار،19؍جنوری (ایس او نیوز) ملک کے سب سے بڑے بحری اڈہ کی حیثیت والے کدمبا بحری اڈے پر دوسرے مرحلے کے توسیعی و تعمیری کام کا جائزہ لینے کے لئے ملک کے مختلف علاقوں سے تعلق رکھنے والے اراکین پر مشتمل کمیٹی کل 20جنوری کو کاروار پہنچ رہی ہے۔
اطلاع کے مطابق بدھ کی صبح بذریعہ ہوائی جہاز اس کمیٹی کے اراکین گوا ائرپورٹ پہنچیں گے پھر وہاں سے روڈ سفر کے ذریعے کاروار بحری اڈہ پہنچیں گے۔ آنے والی اس کمیٹی میں محکمہ دفاع سے متعلق پارلیمنٹ کی اسٹانڈنگ کمیٹی کے 21 اراکین کے علاوہ لوک سبھا کے 10 اراکین شامل ہیں۔ مگر تا حال جملہ 12اراکین کی آمد یقینی ہے۔ اس وفد میں آل انڈیا کانگریس کمیٹی کے لیڈر راہل گاندھی ، این سی پی لیڈر شرد پوار ، جوئیل اورم، اجئے بھٹ، پروفیسر ڈاکٹر رام شنکر کٹھیریا، جگل کشور شرما، ڈاکٹر شریکانت ایکناتھ شندے، پرتاپ سنہا، پریم چندر گپتا، سنجے راوت، کامکھیا پرساداور سدھانیہ تریویدی کاروار پہنچ رہے ہیں۔
معلوم ہوا ہے کہ راہل گاندھی اور شرد پوار کے لئے چونکہ زیڈ پلس ، دیگر چھ اراکین کےلئے وائی پلس اور تین ارکین کو وائی سیکیوریٹی حاصل ہے، اس لئے گوا کی سرحد سے کاروار کے ارگا تک ضلع پولیس کی جانب سے سخت حفاظتی بندوبست کیا جارہا ہے۔
بتایا گیا ہے کہ اراکین پارلیمان کا یہ وفد صبح بحری اڈہ پر پہنچ کر جائزہ لینے کے بعد شام کوگوا کے راستے واپس چلا جائے گا۔ اس وفد کی آمد اور واپسی کے وقت سڑک پر زیرو ٹریفک کا اہتمام کیا جائے گا۔
خیال رہے کہ کاروار بحری اڈے پر دوسرے مرحلہ کا تعمیری کام جاری ہے جس کے ساتھ یہاں پر چل رہی سرگرمیوں کا جائزہ لینااس وفد کی آمد کا اہم مقصد ہے۔ اس کے لئے بحری اڈہ کے افسران پوری تفصیلات کے ساتھ اپنی تیاریاں پوری کرنے میں لگے ہیں۔
