کالی کٹ میں چاند نظر آنے کی تصدیق کے بعد بھٹکل، کمٹہ، اُڈپی اورمنگلور سمیت کیرلا میں رمضان کی شروعات کا اعلان؛ منگل کو ہوگا پہلا روزہ
بھٹکل :12؍ اپریل(ایس اؤ نیوز) کیرلاکےکالی کٹ کے قریبی علاقہ کاپاڈ میں رمضان المبارک کا چاند نظر آنےکی تصدیق کے بعد بھٹکل کے قاضی صاحبان نے بھٹکل میں بھی رمضان المبارک کی شروعات کا اعلان کیا ہے، جس کے ساتھ ہی کل منگل کو یہاں پہلا روزہ ہوگا، جبکہ آج سے تراویح کی شروعات ہوگی۔
قاضی جماعت المسلمین بھٹکل مولانا عبدالرب خطیبی ندوی اور مرکزی خلیفہ جماعت المسلمین بھٹکل کے قاضی مولانا خواجہ معین الدین اکرمی مدنی نے بتایا کہ انہوں نے کاپاڈ قاضی سے راست رابطہ کیا ہے اور مکمل اطمینان کے بعد رمضان کا اعلان کیا جارہا ہے۔
خیال رہے کہ بھٹکل سمیت پڑوسی علاقوں کمٹہ کے ساتھ ساتھ بیندور، کنداپور، گنگولی، اُڈپی اور منگلورو سمیت پڑوسی ریاست کیرلا میں بھی رمضان کی شروعات بروز منگل سے ہوگی یعنی منگل کو رمضان المبارک کا پہلا روزہ ہوگا۔
یاد رہے کہ سعودی عربیہ میں 30شعبان مکمل ہونےکی وجہ سے وہاں بھی منگل کو ہی پہلا روزہ ہونے کا اعلان کیا جاچکاہے۔ اسی طرح دبئی اور عرب امارات میں بھی کل منگل کو ہی پہلا روزہ ہوگا۔ البتہ عمان سے ملی اطلاع کے مطابق وہاں آج چاند نظر نہ آنے کی وجہ سے بدھ کو رمضان کا پہلا روزہ ہوگا۔
یاد رہے کہ ایک طرف کرناٹک کے ساحلی علاقوں سمیت ریاست کیرالہ میں منگل کو رمضان کاپہلا روزہ ہوگا، تو وہیں دوسری طرف ہندوستان کے دیگر کسی بھی علاقہ میں چاند نظر نہ آنے کی وجہ سے بدھ کو پہلا روزہ ہوگا۔