بھٹکل 17 مئی (ایس او نیوز) بھٹکل کڈوین کٹہ ندی میں غرق ہوکر  ایک خاتون اور ایک لڑکا ہلاک ہوگیا جن کی شناخت  پاروتی شنکر نائک (39) اورسورج پانڈو نائک (17)  کی حیثیت سے کی گئی ہے۔ پاروتی نائک کا شوہر  شنکر نائک بھٹکل میونسپالٹی  کا ورکر  بتایا گیا ہے۔

بتایا گیا ہے کہ  شدت کی گرمی کے چلتے   اُسی علاقہ کے سات  نوجوان بشمول تین لڑکیاں   ندی میں  نہارہے تھے کہ اچانک ایک نوجوان سورج غرق ہونے لگا، اُسے  ڈوبتا دیکھ کر ندی کنارے  سورج کے دوست کی ماں  پاروتی نائک اُسے بچانے کے لئے  ندی میں اُتری، مگر  سورج کو بچانے کی کوشش میں وہ بھی غرق ہوگئی۔ واردات جمعہ کی شام قریب چار بجے پیش آئی۔

اطلاع ملتے ہی کڈوین کٹہ علاقہ کے کافی لوگ ندی کنارے جمع ہوگئے جن میں سے بعض لوگوں نے  دونوں کی نعشوں کو باہر نکالا اور بھٹکل سرکاری اسپتال منتقل کیا۔

دولوگوں کی موت کی اطلاع ملتے ہی بھٹکل سرکاری اسپتال میں کافی لوگ جمع ہوگئے۔ دونوں  نعشیں پوسٹ مارٹم کے لئے  مردہ خانے میں رکھی گئی ہے۔

سورج  نائک کے تعلق سے بتایا گیا ہے کہ وہ سرپن کٹہ سرکاری آئی ٹی آئی کالج میں فرسٹ ائیر کا طالب علم تھا۔

بھٹکل مضافاتی پولس تھانہ میں معاملہ درج کیا گیا ہے۔

بتاتے چلیں کہ گذشتہ  تیس دنوں  کے اندر  پانی میں غرق ہوکر   مرنے کی یہ تیسری واردات ہے، پہلا حادثہ  21/اپریل کو پیش آیا تھا جب دو نوجوان سودی گدّے  سمندر میں  غرق ہوکر جاں بحق ہوگئے تھے۔ دوسری واردات  5/مئی کو مرڈیشور سمندر میں پیش آئی تھی اور یہاں بھی دو لوگوں کی موت واقع ہوئی تھی، اُس کے بعد اب  تیسری واردات کڈوین کٹہ ندی میں پیش آئی ہے اور یہاں بھی دو لوگوں کی موت واقع ہوئی ہے۔ یعنی گذشتہ تیس دنوں کے اندر چھ لوگوں کی موت پانی میں غرق ہونے سے ہوئی ہے۔