منگلورو:پولیس فائرنگ کے مقام پر منائی گئی یوم جمہوریہ کی تقریب
منگلورو27/جنوری (ایس او نیوز) شہریت ترمیمی قانون کے خلاف احتجاج کے دوران منگلورو بندر پولیس اسٹیشن کے حدود میں عزیزالدین روڈ پر جہاں پولیس فائرنگ کی وجہ سے عبدالجلیل اور نوشین نامی دو افراد ہلاک ہوئے تھے، اسی مقام پر عوام نے یوم جمہوریہ کی تقریب منعقد کی۔
اس مقام پر تقریب منعقد کرنے والوں کا کہنا ہے کہ ملک میں دستور اور جمہوریت کی بحالی کا عہد کرنااس کا اہم مقصد تھا۔مہلوک عبدالجلیل کی بیٹی شیفانی اور بیٹے جمیل نے پرچم کشائی کی۔اس موقع پر شیفانی نے دستور کی تمہید (پریامبل) پڑھنے کی رسم بھی انجام دی۔سماجی خدمت گار ودیا دینکر نے خطاب کرتے ہوئے کہا کہ یہ وہ مقام ہے جہاں پر ملک کے دستور کا قتل ہوا ہے۔اور ملک کے مختلف مقامات پر روزانہ دستور کا قتل ہورہا ہے۔ہر د ن ہمیں دستور دوبار ہ حاصل کرنے کی جدوجہد کرنی ہوگی۔اور یہ سلسلہ جاری رہنا چاہیے۔انہوں نے کہا کہ پولیس فائرنگ سے قتل ہونے والے عبدالجلیل اور نوشین کو انصاف ملنے تک جد وجہد جاری رہنی چاہیے۔ودیا دینکر نے مطالبہ کیا کہ فائرنگ میں جان گنوانے والوں کو حکومت نے معاوضہ دینے کا اعلان کرنے کے بعد اسے رد کردیا تھا، وہ معاوضہ متاثرہ خاندان والوں کو ملنا چاہیے اور تشدد کی واقعات کی عدالتی جانچ ہونی چاہیے۔
اس موقع پر کارپوریٹر عبداللطیف، ریٹائرڈ ٹیچر گلولی، ڈی وائی ایف آئی کے ضلع صدر بی کے امتیاز، ایس آئی او کے رکن طلحہ اسماعیل، ماہنامہ انوپما کی ایڈیٹر شہناز وغیرہ نے بھی حاضرین سے خطاب کیا۔ نیشنل ویمنس فرنٹ کی صدر شاہدہ اسلم، عمیرہ بانو، سماجی خدمت گار شبیر احمد اور دیگر افراد موجود تھے۔