کاروار،3/جنوری (ایس او نیوز) کرناٹک کے وزیر اور بھٹکل سے منتخب رکن اسمبلی منکال وئیدیا نے کہا کہ رام مندر کی تعمیر کے لئے انہوں نے بھی فنڈ دیا ہے اس لئے ان کا بھی 22 جنوری کو رام مندر کے افتتاحی پروگرام میں شریک ہونے  ایودھیا جانے کا منصوبہ ہے۔

 کاروار میں اخبار نویسوں سے گفتگو کرتے ہوئے منکال ویدیا نے کہا کہ بی جے پی ہر چیز میں سیاست کرتی ہے۔ یہ رام کے معاملے میں بھی سیاست کرنا چاہتی ہے۔ جبکہ ہم لوگ (کانگریس والے) غربت مٹانے کے لئے سیاست کرتے ہیں۔ 

انہوں نے کہا کہ رام خود بی جے پی کی گھٹیا پن کا حساب لے گا۔ میں کانگریس کا آدمی ہوں۔ میں نے رام مندر کی تعمیر کے لئے پیسہ دیا ہے۔ ہماری ہائی کمان اس معاملے میں مداخلت نہیں کرے گی۔ ہائی کمان بھی ایودھیا جاسکتا ہے۔ اگر 22 جنوری کو وہاں جانا ممکن نہ ہوسکا تو میں اگلے چند دنوں میں جاؤں گا۔ 

انہوں نے کہا کہ بھگوان سے عقیدت ذاتی ہے۔ اس سوال کا جواب دیتے ہوئے کہ ریاست میں بابری مسجد کو گرانے والوں کو گرفتار کیا جارہا ہے، انہوں نے کہا کہ پولیس نے عدالت کی ہدایت کے مطابق کارروائی کی ہے۔ انہوں نے پوچھا کہ جرم چاہے کتنا ہی پرانا ہو، کیا انہیں چھوڑا جاسکتا ہے؟ پولیس نے قانون کے مطابق کارروائی کی ہے۔ انہوں نے کہا کہ بی جے پی اس میں بھی سیاست کرنے کی کوشش کررہی ہے۔