چار ماہ بعد بلائی گئی میونسپالٹی میٹنگ میں کئی مسائل پر تبادلہ خیال؛ مچھلی مارکٹ کو شفٹ نہ کرنے سمیت دیگر مسائل پر کونسلروں نے ظاہر کی ناراضگی
بھٹکل 12 جنوری (ایس او نیوز) چار ماہ بعد بلائی گئی بھٹکل میونسپالٹی کی میٹنگ میں مچھلی مارکٹ کو اب تک شفٹ نہ کرنے، یوجی ڈی کا مسئلہ حل نہ ہونے اور اربن بینک سے متصل پارک کی مرمت وغیرہ سمیت دیگر مسائل پر کونسلروں نے آواز اُٹھائی ۔
فش مارکٹ کے تعلق سے میونسپل صدر سے جواب طلب کیا گیا کہ چار ماہ قبل یعنی 6 ستمبر کو ہوئی میونسپل میٹنگ میں جو قرارداد منظور کی گئی تھی اُس پر اب تک عمل کیوں نہیں کیا گیا، کونسلروں نے اس بات پر سخت ناراضگی ظاہر کی کہ پرانی مارکٹ کا پانی کنکشن اور الیکٹرک کنکشن کو کاٹنے کی بات طے ہوئی تھی، اُسی طرح صفائی ستھرائی نہ کرنے وغیرہ پر بھی بات ہوئی تھی، تاکہ نئی فش مارکٹ کو استعمال میں لایاجاسکے، مگر اب تک اس پر عمل نہیں کیا گیا ہے۔ صدر پرویز قاسمجی نے اس پر جلد عمل کرنے کی یقین دھانی کرائی۔
یو جی ڈی کے تعلق سے بتایا گیا کہ اب تک ویٹ ویل کا کام مکمل نہیں ہوا ہے، مرمت کا کام بھی باقی ہے، اس تعلق سے کاروار جاکر ڈپٹی کمشنر سے ملاقات کرنا طے پایا۔
میٹنگ میں میونسپالٹی کےنائب صدر قیصر محتشم نے بھٹکل اربن بینک سے متصل گارڈن اور فوارے کے لئے 10لاکھ روپئے خرچ کرنے کے تعلق سے بتایا کہ وہاں انجام دئے گئے کام کے متعلق ممبران کو کوئی خبر ہی نہیں ہے۔ اس کے علاوہ کچرا نکاسی مرکز میں قریب 16لاکھ سے زائد روپیوں کا کام ہواہے، بلدیہ حدود کی اندرونی نالیوں اور نالیوں سے کیچڑ نکالنے کے لئے بھی لاکھوں روپئے استعمال کئے گئےہیں۔ اسی طرح حساب لگاتے جائیں گے تو 50لاکھ روپئے منظور ہوئے ہیں۔ انہوں نے کاموں کے متعلق ممبران کو جانکاری دئیے بغیر ٹھیکدار کو بل اداکئے جانے پر عدم اطمینان کا اظہار کیا۔
صدر پرویز قاسمجی نے جواب دیتے ہوئے متعلقہ انجنئیر سے کہا کہ جتنے کام انجام پائے ہیں،اُن کاموں کی فہرست اور اندراج رجسٹرممبران کے سامنے پیش کریں۔ اگر اس میں کوئی غلطی پائی گئی تو متعلقہ خاطی افسر کے خلاف سخت کاروائی کی جائے گی۔
کافی تاخیر یعنی چار ماہ بعد میونسپالٹی میٹنگ بلانے پر بھی ممبران نے آواز اُٹھائی اوربھٹکل شہری سطح پر میونسپالٹی کی جانب سے دئیے گئے سی سی ٹی وی کیمرے اوراس کی نگرانی کے متعلق بھی گرما گرم بحث ہوئی۔ میٹنگ میں چیف آفسر رادھیکا سمیت کونسلرس محی الدین الطاف کھروری، پاسکل گومس،اِمشاد مختصر وغیرہ موجود تھے۔