منگلورو میں آج سے ماسک نہ پہننے والوں پر لگے گا 1000روپے جرمانہ!
منگلورو،5؍اکتوبر (ایس او نیوز) جنوبی کینرا ضلع انتظامیہ نے کورونا کے بڑھتے ہوئے معاملات پر روک لگانے کے لئے ریاستی حکومت کی تازہ گائڈ لائنس سختی کے ساتھ لاگو کرنے کا فیصلہ کیا ہے۔
ڈپٹی کمشنرڈاکٹر کے وی راجیندرا نے بتایا کہ 5 اکتوبر سے میونسپل کارپوریشن کے حدود میں عام چہل پہل کے مقامات پر ماسک پہنے بغیرباہر نکلنے والوں پر 1000روپے جرمانہ لگانے کی ہدایت متعلقہ افسران کو جاری کردی گئی ہے۔جبکہ کارپوریشن حدود سے باہر جرمانے کی رقم 500 روپے رہے گی۔اس سے پہلے منگلورو میں ماسک نہ پہننے پر 200روپے جرمانہ لگایا جارہا تھا۔
خیال رہے کہ پوری ریاست میں کورونا متاثرین کی تعداد میں اضافہ ہوتا جارہا ہے۔ کل 4اکتوبر کو ریاستی سطح پر ایک ہی دن میں متاثرین کی تعداد 10,000رہی ہے۔ اسی طرح اموات میں بھی کو ئی کمی نہیں آرہی ہے۔ ان حالات کو دیکھتے ہوئے ریاستی حکومت نے ماسک نہ پہننے والوں کے لئے جرمانہ کی رقم بڑھاکر سٹی کارپوریشن حدود میں ایک ہزار روپے اور بقیہ مقامات پر 500روپے وصول کرنے کا فیصلہ کیا تھا اور تمام ضلع ڈپٹی کمشنروں کو نئے قوانین لاگو کرنے کی ہدایت جاری کی گئی تھی۔
جبکہ اڈپی ضلع کے ایڈیشنل ڈپٹی کمشنر سدا شیوا پربھونے بتایا کہ اڈپی ضلع میں کل 4اکتوبر سے ہی ماسک نہ پہننے والوں سے 500 جرمانہ وصول کرنا شروع کردیا گیا ہے۔