منگلورو،3 / جولائی (ایس او نیوز) کل رات سے شہر میں برس رہی زبردست موسلا دھار بارش کی وجہ سے عام زندگی متاثر ہوگئی ہے۔
    
پمپ ویل فلائی اوور کے نیچے کے علاقہ   گھٹنوں تک پانی  میں ڈوب گیا ہے  جس کی وجہ سے منگلورو شہر کی طرف جانے والا ٹریفک کئی گھنٹوں سے جنکشن کے پاس جام ہوگیا ہے ۔ ٹریفک پولیس کی اضافی کمک اس علاقے میں بھیج دی گئی ہے اور حالت ایسی ہوگئی ہے کہ ٹریفک کا راستہ تبدیل کرنے کے سوا پولیس کے پاس کوئی چارہ نظر نہیں آ رہا ہے ۔ اس کے علاوہ کوٹارا چوکی جنکشن پر بھی پانی جمع ہوگیا ہے۔ 
    
شہریوں کا کہنا ہے کہ ہر سال بھاری برسات ہونے پمپ ویل اور کوٹارا جنکشن پر بہت زیادہ پانی جمع ہونا اور عوام کے ساتھ ساتھ موٹر گاڑیوں کے لئے مسائل کھڑے ہونا معمول بن گیا ہے اور اس کے تدارک کے لئے انتظامیہ کی جانب سے کوئی مستقل حل نکالا نہیں جاتا۔ 
    
شہر کے پی وی ایس سرکل سے ہمپن کٹا کے راستے میں خیبر پاس لین پر کورٹ احاطہ کے قریب ایک پہاڑی چٹان کھسکنے کا واقعہ پیش آیا ۔ اس سے تھوڑی دیر کے لئے ٹریفک میں خلل واقع ہوا ۔ موسلا دھار بارش کے نتیجے میں یہاں مزید زمین کھسکنے کے امکانات پیدا ہوگئے ہیں۔
    
اسی دوران محکمہ موسمیات نے پیشین گوئی کرتے ہوئے کہا ہے کہ بھاری برسات کا یہ سلسلہ 7 جولائی تک یونہی چلتا رہے گا ۔ اس ضمن میں محکمہ نے آرینج الرٹ بھی جاری کیا ہے۔