جنوبی کینرا میں جاری ہے برسات کا سلسلہ۔ بجپے میں کھسک گئی زمین۔ وٹلا میں مکان گرنے سے دو افراد شدید زخمی
منگلورو،20؍ستمبر (ایس او نیوز) جنوبی کینرا میں گزشتہ ایک ہفتے سے برسنے والی بارش کا ابھی جاری ہے جس کی وجہ سے کئی مقامات پرنقصانات ہونے کی خبریں مل رہی ہیں۔ شہر کے باہری علاقے نیرومارگا اور اڈیا پاڈی میں زمین کھسکنے کی وجہ سے سڑک رابطہ منقطع ہوگیا ہے۔اور پیشگی احتیاط کے طور پر اس راستے پر موٹر گاڑیوں کی آمد ورفت روک دی گئی ہے۔
موصولہ رپورٹ کے مطابق سنیچر کے دن صبح سے شروع ہونے والی تیز برسات رکنے کا نام نہیں لے رہی ہے۔شہر کے کودرولی اور دوسرے علاقوں میں ہر جگہ برساتی پانی جمع ہونے کی وجہ سے لوگوں میں خوف و ہراس پیدا ہوگیا ہے۔فائر بریگیڈ ذریعے سے معلوام ہے کہ فلنیر علاقے میں ایک بڑا درخت زمین سے اکھڑ کر گر گیا ہے۔
اس کے علاوہ وٹلا کے پاس سریپلا نامی علاقے میں ایک مکان پر پہاڑی تودا گرنے کی وجہ سےگھر پوری طرح تباہ ہوگیا ہے بتایا جاتا ہے کہ جب رات کے پہاڑی چٹان کا ایک ٹکڑا کھسک کر گھر کے باورچی خانے پر گرا تو اس وقت 6افراد گھر میں موجود تھے۔آواز سنتے ہی گھر والے گھبرا کر باہرکی طرف دوڑنے لگے۔ تب تک وہ تود ا پورےگھر پر گرگیا ۔ اور چھ میں سے دو افراد شدید زخمی ہوگئے۔ انہیں علاج کے لئے منگلوروکے اسپتال میں داخل کیا گیا ہے، جبکہ معمولی زخمی ہونے والے بقیہ چاروں کو وٹلا سرکاری اسپتال میں داخل کیا گیا ہے۔
