منگلورو انٹرنیشنل ایئر پورٹ اب ’آدانی گروپ ‘کے ہاتھوں میں جانے کے لئے تیار
منگلورو،17؍اکتوبر (ایس او نیوز) ملک کے مختلف ایئر پورٹس کو مرکزی حکومت کی پالیسی کے مطابق نجی کمپنیو ں کو لیز پر دینے کا جو سلسلہ شروع کیاگیا ہے اس میں منگلورو انٹرنیشنل ایئر پورٹ بھی شامل ہے، جس کے بارے میں پتہ چلا ہے کہ جائزہ اور معائنہ کا کام مکمل ہوچکا ہے اور عملی طور پر چند دنوں میں یہ ایئر پورٹ گوتم آدانی کی کمپنی’ آدانی گروپ‘ کی تحویل میں دینے کا عمل شروع ہوجائے گا۔
اہم ذرائع سے ملی اطلاعا ت کے مطابق گزشتہ 69 برسوں سے سرکاری ادارے کے طور پر اپنی خدمات انجام دینے والا منگلورو ایئر پورٹ اب 24اکتوبرکی نصف شب سے پرائیویٹ ہاتھوں میں چلا جائے گااور12 نومبر تک یہ عمل مکمل ہوجائے گا۔
معلوم ہوا ہے کہ ایئر پورٹ کو آدانی گروپ کے حوالے کا کام پورا ہونے کے بعد بھی آئندہ دو تین برسوں تک آدانی گروپ اور ایئر پورٹ اتھاریٹی آف انڈیادونوں مشترکہ طور پر ایئر پورٹ کا انتظام سنبھالیں گے ۔ اس عرصے میں ایئر پورٹ کے مالیاتی اور تجارتی سرگرمیاں آدانی گروپ کے ذمہ دار وں کے پاس ہونگی جبکہ طیاروں کی آمد ورفت، ایئر ٹرافک کنٹرول، سیکیوریٹی ، ایئر لائن اسٹاف اور دیگر انتظامی ذمہ داریاں ایئر پورٹ اتھارٹی آف انڈیاکے افسران سنبھالیں گے۔اس کے علاوہ اس وقت جو اسٹاف موجود ہے وہ حسب معمول برقرار رہیں گے اور ایک سال کے بعد آدانی گرو پ کی طرف سے نئے تقررات کیے جائیں گے۔فی الحال کچھ مہینوں تک ایئر پورٹ ڈائریکٹر کا موجودہ عہدہ برقرار رہے گا اور پھر ا س کے بعد آدانی گروپ کا ایکزیکٹیو آفیسر یہ منصب اور اس کی ذمہ داریاں اپنے ہاتھ میں لے گا۔