منگلور انڈیانا اسپتال میں 'کی ہول سرجری ٹوی' سے دل کا والو کامیابی کے ساتھ تبدیل؛ اوپن ہارٹ سرجری کی اب ضرورت نہیں
منگلورو7/دسمبر (ایس او نیوز)مینگلور کے معروف انڈیانا اسپتال میں ڈاکٹر یوسف کمبلے کی قیادت میں ڈاکٹروں کی ایک ٹیم نے مریض کے دل کا والوvalve) (بدلنے کے لئے جدید ترین طریقہ ’ٹوی‘ کا استعمال کیا اور کی ہول سرجری کے ذریعے ’شہ رگ‘ (aorta)کے خراب والو کو نئے والوسے بدلنے میں پوری طرح کامیاب رہے۔
عام طور پر ایسے معاملے میں اوپن ہارٹ سرجری کی جاتی ہے، لیکن مریض اگر عمر رسیدہ ہے تو پھر ایسے آپریشن میں زیادہ خطرات ہوتا ہے۔ اس لئے شہ رگ کے والوکو بدلنے کے لئےTranscatheter Aortic Valve Implantation(TAVI)کا طریقہ اپنایا جاتا ہے۔جو کہ فی الحال ملک کے چند مشہور اور اعلیٰ پیمانے کے اسپتالوں میں ہی دستیاب ہے۔
انڈیانا ہاسپٹل اور ہارٹ انسٹی ٹیوٹ لمیٹیڈ کے تحت اس جدید ترین طریقے کا استعمال سیامویل ڈینیئل نامی مریض پر کیا گیا۔ سانس لینے میں انتہائی دشواری کی شکایت کے ساتھ مڈیکیرے کا یہ مریض انڈیانا اسپتال پہنچا تھا۔اس کو اوپن ہارٹ سرجری کے بجائے کم خطرے والے ’توی‘ کے استعمال پر راضی کیا گیا۔ اس میں ایک کی ہول کے ذریعے کیتھیٹر قلب میں داخل کیاجاتا ہے اور اسی سے والو کو بدلاجاتا ہے۔ اس میں مریض کا خون بھی نہیں بہتا اورصرف چھ گھنٹے آئی سی یو میں رکھنے کے بعد مریض کو عام کمرے میں منتقل کیا جاتا ہے۔
پریس کانفرنس سے خطاب کرتے ہوئے ماہر امراض قلب ڈاکٹر یوسف کمبلے نے بتایا کہ دس سال بعد اس بدلے گئے والو میں کوئی خرابی پیدا ہوتی ہے تو پھر اس کو دوبارہ اسی انداز سے بدلا جاسکتا ہے۔ یہ والو اگر بیرونی ممالک سے منگوایا جاتا ہے تو اس کی لاگت تقریباً 25لاکھ روپے ہوتی ہے۔ اندرون ملک یہ والو 12لاکھ روپوں میں دستیاب ہے۔اگر اندرون ملک ملنے والا والو استعمال کریں گے تو اس آپریشن کے لئے جملہ خرچ تقریباً 15لاکھ روپے آتا ہے۔
پریس کانفرنس کے دوران ڈاکٹر یوسف کمبلے کے علاوہ ڈاکٹر علی کمبلے، ڈاکٹر مدن، ڈاکٹر منصور اور مریض سیامویل موجود تھے۔
