منگلورو میں پیپل کا درخت گرنے سے تین موٹر گاڑیوں کو پہنچا بھاری نقصان
منگلورو،24؍جنوری (ایس او نیوز) آج صبح8 بجے کے قریب کار اسٹریٹ پر وینکٹرمنا مندر کے سامنے ایک بہت بڑا پیپل کا درخت جڑوں سے اکھڑ گیا اوروہاں پر پارک کی گئی تین موٹر گاڑیوں پر گر گیا۔
خوش قسمتی سے درخت گرتے وقت اتوار کا دن ہونے کی وجہ سے اس علاقے میں زیادہ چہل پہل نہیں تھی اس لئے کوئی جانی نقصان نہیں ہوا۔ البتہ وہاں پر موجود ایک پانی کے ٹینکر، ایک کرین اور ایک موٹرکار کو بھاری نقصان پہنچا ہے۔ عینی شاہدین کا کہنا ہے کہ درخت سڑک کی جانب گرنے سے زیادہ نقصان نہیں ہوا ہے ورنہ اگر کمپاونڈ کے اندرونی حصے کی طرف گرتا تو وہاں پر دکان اور مندر کے علاوہ بہت سے پارک کی ہوئی گاڑیاں تھیں ، اس لئے بہت ہی زیادہ نقصان ہو سکتا تھا۔
سمجھا جاتا ہے کہ یہ پیپل کا درخت شہر میں موجود سب سے قدیم درختوں میں سے ایک تھا۔ اس علاقے کے لوگ کہتے ہیں کہ یہ درخت کم از کم ایک ہزار سال پرانا تھا۔ ایک شخص نے بتایا کہ پانچ چھ سال قبل منگلورو سٹی میونسپل کارپوریشن نے سڑک کی توسیع کے لئے اس درخت کو اکھاڑنے کا منصوبہ بنایا تھا ، لیکن مقامی لوگوں کی مخالفت کی وجہ سے اس پر عمل نہیں ہوا تھا۔
