منگلورو : گروہی رقابت میں راوڈی شیٹر پر ہوئے جان لیوا حملہ کے چار ملزمین گرفتار
منگلورو،4؍ دسمبر (ایس او نیوز) چند دن پہلے راوڈی شیٹر انکیت بولور پر جو جان لیوا حملہ ہوا تھا اس تعلق سے پولیس نے چار ملزمین کو گرفتار کرنے کے ساتھ حملہ میں استعمال کی گئی تین دو پہیہ گاڑیاں ، ایک آٹو رکشہ اور تین تلواریں ضبط کر لیں ۔
خیال رہے کہ 27 نومبر کو انکیت بولور پر جان لیوا حملہ ہوا تھا جس میں انکیت کا دوست شرن بری طرح زخمی ہوا تھا اور شبہ ظاہر کیا گیا تھا کہ یہ آلکے اور بولور گینگس کے درمیان رقابت کا نتیجہ ہے ۔
اوروا پولیس نے اس وقت جن لوگوں کو گرفتار کیا ہے ان کی شناخت نونیت نائیک، ہیمنت، دیکشیت کے طور کی گئی ہے جو کہ کلیدی ملزمین ہیں ، جبکہ ملزمین کو پناہ دینے کے الزام میں سندیش نامی ایک شخص کو بھی گرفتار کیا گیا ہے ۔
بتایا جاتا ہے کہ 2014 میں آلکے گینگ کے گرگوں نے بولور گینگ گرگے تلوار جگا عرف جناردھنا بولور کے بیٹے سنجے عرف ورون کو قتل کیا تھا ۔ تب سے یہ گروہی جنگ شروع ہوئی ہے جس میں بدلہ کے طور پر 2019 میں بولور گینگ کے گرگوں نے آلکے گینگ کے غنڈے ریتیش پر ہلاکت خیز حملہ کیا ۔ پھر 2020 میں آلکے گینگ کے اندرجیت کو قتل کر دیا ۔ اس معاملہ میں الہاس کنچن، راکیش عرف راکی ، شرن عرف چانو، کوشک ، عاشق اور موکشیت ابھی جیل میں بند ہیں ۔
اب پھر ایک بار 27 نومبر کی رات میں مقتول اندرجیت دوست نونیت ، ہیمنت، دیکشیت اور آلکے گینگ کے دیگر گرگوں نے بولور گینگ کے جیل میں بند کوشک اور عاشق کے بھائی انکیت کو جان سے مارنے کے لئے حملہ بول دیا ۔ اس حملہ میں کی زد میں آنے سے انکیت تو بچ نکلا مگر اس کے دوست شرن کی گردن پر تلوار کے گہرے زخم آئے جسے علاج کے لئے اسپتال میں داخل کیا گیا ہے۔