منگلورو ،24 / اپریل (ایس او نیوز) دکشن کنڑا کے ڈپٹی کمشنر مولئی موہیلن کی طرف سے جاری کیے گئے احکامات کے مطابق لوک سبھا الیکشن سے متعلق عوامی تشہیری مہم اور اجلاس وغیرہ کی مہلت آج شام بجے ختم ہو جائے گی جس کے بعد 48 گھنٹے کا 'سائلینس پیریڈ' شروع ہو جائے گا ۔
    
ڈی سی نے حکم دیا ہے کہ جیسے ہی تشہیری مہم کا وقت ختم ہو جائے گا، اسی وقت ضلع میں موجود ایسے تمام سیاسی لیڈروں کو ضلع سے نکل جانا ہوگا جو کہ یہاں کے ووٹرس نہیں ہیں ۔ ڈی سی نے سیاسی پارٹیوں اور اس کے امیدواروں سے کہا ہے کہ وہ لوگ ووٹرس کو پولنگ اسٹیشن تک لانے کے لئے موٹر گاڑیوں کا انتظام نہ کریں ۔ 
    
ضلع انتظامیہ کی طرف سے دکشن کنڑا میں 24 اپریل شام  6 بجے سے 26 اپریل نصف شب تک شراب کی فروخت پر پابندی رہے گی اس لئے کسی بھی ہوٹل یا لائسنس یافتہ دکاندار کو شراب فروخت کرنے کی اجازت نہیں رہے گی ۔ 
    
ڈی سی نے بتایا کہ 17.72 لاکھ ووٹرس کو ووٹر انفارمیشن سلپس تقسیم کیے گئے ہیں اور مضافات میں ایسی سلپس پر پولنگ اسٹیشن کی نشاندہی کرنے والا کیو آر کوڈ بھی پرنٹ کیا گیا ہے ۔ 24 اپریل شام 6 بجے سے 26 اپریل رات 10 بجے تک دکشن کنڑا میں امتناعی احکامات نافذ رہیں گے ۔ اس کے تحت پانچ سے زیادہ افراد ایک جگہ جمع ہونے، عوامی اجلاس منعقد کرنے، جلوس نکالنے نعرے بازی کرنے،  پتلے جلانے یا ہتھیار وغیرہ اپنے ساتھ لےجانے پر پابندی رہے گی ۔ البتہ مذہبی پروگرام اورشادی کی تقریبات کے لئے چھوٹ رہے گی ۔ پولنگ اسٹیشن کے اطراف 200 میٹر کے حدود میں کسی قسم کی تشہیر نہیں کی جا سکے گی ۔ سوائے پولنگ ڈیوٹی پر مامور افسران کے کسی بھی شخص کو موبائل فون یا کوئی الیکٹرانک آلہ دو سو میٹر کے حدود کے اندر اپنے ساتھ لے جانے کی اجازت نہیں رہے گی ۔ لاوڈ اسپیکرس اور میوزک کے استعمال اور اشتعال انگیز حرکات ، کسی کی تضحیک اور تصاویر وغیرہ نمایاں کرنے کی بھی اجازت نہیں رہے گی ۔ 
    
ڈپٹی کمشنر نے بتایا کہ ان قوانین کی پابندی نہ کرنے والوں کے خلاف پولیس کی طرف سے قانونی کارروائی کی جائے گی ۔