منگلورو 13/ جنوری (ایس او نیوز) آج صبح    نہرو میدان کے  پاس ایک مہاجر مزدور سے موبائل فون چرا کر بھاگنے والے چور کو پولیس نے سنیما اسٹائل میں پیچھا کرکے  گرفتار کر لیا۔ بعد میں اس کے ساتھی کو بھی دھر دبوچا گیا۔

اطلاع  کے مطابق سڑک پر عوامی چہل پہل کے دوران ایک شخص موبائل چرا کر بھاگنے والوں کا پیچھا کرتا نظر آیا ۔ موقع پر موجود اسسٹنٹ ریزرو سب انسپکٹر ورون آلوا نے بھی چور کا پیچھا کیا اور تھوڑی ہی دوری پر اسے دبوچ کر زمین پر گرا دیا ۔ پھر مقامی لوگوں کی مدد سے چور کے پاس سے چرایا گیا فون برآمد کرلیا ۔ چور کا پیچھا کرکے اسے دبوچنے کا یہ معاملہ عوام کے لئے  بالکل کسی سنیما کا سین لگ رہا تھا ۔ اس دوران دوسرا چور فرار ہونے میں کامیاب ہوگیا ۔

 گرفتار چور کی شناخت ہریش پجاری کے طور پر کی گئی ہے ۔ اس سے پوچھ تاچھ کے بعد اس کے دوسرے ساتھی کو بھی بعد میں گرفتار کرلیا گیا ، جس کا نام شامانت بتایا گیا ہے ۔ جبکہ مزید ایک ملزم مفرور  ہے ۔

 بتایا جاتا ہے کہ جس شخص کا موبائل فون چھین کر یہ لوگ فرار ہو رہے تھے وہ گرینائٹ کا کام کرنے والا راجستھان کا مہاجر مزدور پریم نارائن یوگی  ہے ۔ جبکہ گرفتار کیے گئے ملزمین کے تعلق سے پتہ چلا ہے کہ یہ  چار پانچ افراد کی ٹولی ہے جو لوگوں سے قیمتی چیزیں چھین کر بھاگنے کی وارداتیں انجام دیتی ہے ۔

 چوروں کو پکڑنے میں ورون آلوا نے جو چابک دستی دکھائی تھی اس کی عوام خوب  سراہنا کررہے ہیں۔ پانڈیشور پولس تھانہ میں اس تعلق سے معاملہ درج کیا گیا ہے اور پولس مزید  چھان بین کررہی ہے۔