ریاض 21/ مارچ (ایس او نیوز): ریاض کے مضافاتی علاقہ زُلفیٰ میں پیش آئے ایک المناک کار حادثے میں مینگلورو کے ایک ہی خاندان کے 4 افراد جاں بحق ہوگئے، جن میں 3 ماہ کا بچہ بھی شامل ہے۔ حادثہ بدھ کی شب کو اُس وقت پیش آیا جب یہ لوگ عمرہ کے لیے قطر سے مدینہ منورہ (سعودی عرب) جا رہے تھے۔
مرنے والوں کی شناخت مینگلور کے قریب ہلے انگڈی، تھوکورکے رہائشی شمیم اور زرینہ کی بیٹی حِباء (29)، اس کے شوہر محمد رمیز (34)، ان کے بچے آروش (تین سال) اور راحہ (تین ماہ) کی حیثیت سے کی گئی ہے۔
متوفی حبا کی بہن شبنم کی بیٹی فاطمہ (19) اس حادثہ میں شدید زخمی ہوئی ہیں اور اس وقت ریاض کے ایک اسپتال میں زیرعلاج ہیں۔ معجزانہ طور پرحِباء کی بہن، لبنیٰ کا بیٹا، عیسیٰ (4 سال) اس حادثے میں محفوظ رہ گیا ہے۔
پتہ چلا ہے کہ یہ دو کاروں پر سوار یہ خاندان منگل کو فجر کی نماز ادا کرنے کے بعد عمرہ کے لیے روانہ ہوا تھا، منگل رات کو ریاض پہنچ گیا۔ انہوں نے ریاض میں اپنے قریبی رشتہ دار کے ہاں قیام کیا اور بدھ کی صبح عمرہ کے لیے اپنے سفر پر روانہ ہوگئے۔
رمیز اپنی بیوی حِباء، بچوں آروش راحہ اور حِباء کی بہن کے بچوں فاطمہ اور عیسیٰ کے ساتھ ایک کار میں سفر کر رہے تھے۔ جبکہ دوسری کار پر حِباء کے والد شمیم اور والدہ زرینہ سمیت دیگر گھر کے لوگ سفر کر رہے تھے۔
رمیز کی گاڑی ریاض سے طائف جانے والے روڈ پر قریب 250 کلو میٹر دور زُلفیٰ نامی مقام پر سڑک کے ڈیوائیڈر سے ٹکراگئی۔ ٹکر کی شدت کا اندازہ اس بات سے لگایا جاسکتا ہے کہ تیز رفتارکار ڈیوائیڈر سے ٹکرانے کے بعد سڑک سے کئی میٹر دور اُڑ کر اُلٹ گئی۔ بتایا گیا ہے کہ رمیز، حِباء اور ایک بچہ موقع پر جاں بحق ہوگئے جبکہ دوسرا ایک بچہ ہسپتال پہنچنے کے بعد دم توڑدیا۔ انا للہ وانا الیہ راجعون