مینگلور 27مئی (ایس او نیوز) جنوبی کینرا کے ضلعی انچارج وزیر یو ٹی قادر نے لوک سبھا انتخابات کے نتائج کےبعد اخبارنویسوں سے گفتگو کرتے ہوئے رکن پارلیمان نلین کمار کٹیل پر طنزیہ وار کیا اور وزیراعظیم نریندر مودی سے درخواست کی کہ کم از کم اس بار نلین کمار کٹیل کو مرکزی کابینہ کا وزیر بنائیں تاکہ مینگلور کے پمپ ویل اور تھوکوٹّو میں مدتوں سے جاری اور نامکمل فلائی اوور پروجکٹ کو مکمل کیا جاسکے۔
گذشتہ دو میعادوں میں نلین کمار کٹیل سڑکوں کی تعمیراتی کاموں کو مکمل کرنے میں ناکام ثابت ہوئے ہیں ۔جس کی وجہ سے وہ " پمپ ویل مین " کے نام سے معروف ہورہے ہیں ۔بی جےپی کارکنوں کا مشورہ ہے کہ کٹیل کو روڈ ٹرانسپورٹ اینڈ ہائی وے منسٹری ملنی چاہئے۔لیکن یوٹی قادر نے کہا کہ ؛مجھے خوشی ہوگی اگر کٹیل اربن ڈیولپمنٹ کے وزیر بنیں کیونکہ میں ریاستی کابینہ میں اربن ڈیولپمنٹ وزیر ہوں۔ کٹیل بھی اگر اسی محکمہ میں مرکزی وزیر بنتے ہیں تو کام کرنے میں آسانی ہوگی۔ ویسے تو کانگریس نے اپنے انتخابی پرچار میں نامکمل فلائی اووروں کی تعمیر کواپنا انتخابی مدعا بنایا تھا مگر کانگریس کے متھن رائے کے مقابلے میں بی جےپی کےنلین کمار کٹیل پھر ایک بار انتخاب جیت گئے جس پر طنز کرتے ہوئے یوٹی قادر نے کہا کہ میرے خیال میں یہ سبھی نامکمل کام اُسی وقت پورے ہوسکتےہیں جب کٹیل مرکزی وزیر بن کر آتے ہیں۔