منگلورو:6؍مارچ  (ایس اؤ نیوز)’ایک ملک ، ایک الیکشن ‘بحث کا موضوع ہی نہیں ہے، دراصل اس کے پیچھے دستور کی اصل منشاء کو تبدیل کرنے کا مقصد ہے، اس بات کا الزام  سابق وزیر یو ٹی قادر نے لگایا۔ پریس کانفرنس سے خطاب کرتے  ہوئےکہا انہوں نے کہا کہ ملک بھر کے  عوام پریشان ہیں، بحث کے لئے بے شمار عوامی مسائل ہیں ، پٹرول، ڈیزل ،پکوان گیس سلینڈر کی قیمتوں میں اضافے سے زندگی اجیرن ہوگئی ہے ۔زمینی حقائق سے چشم پوشی کرتےہوئے جمہوری مخالف ایک ملک ایک الیکشن کو موضوع بحث نہیں بنایاجاسکتا۔ نہ ہی کانگریس نے اس کی منظوری دی ہے۔ اگر متعلقہ منصوبہ نافذ کیا جاتاہے تو علاقائی سیاسی پارٹیوں اور علاقائی مسائل کی کوئی اہمیت باقی نہیں رہے گی وہ خود بخود اپنی بنیاد کھو دیں گی، اس طرح یہ بحث ملک کے جمہوری نظام کو نقصان پہنچائے گی، اسی لئے کانگریس اس کی مخالفت کررہی ہے۔

کینجارو میں موجود گوشالہ پر بات کرتےہوئے یوٹی قادر نے کہاکہ کینجارو کا گوشالہ اتی کرم زمین پر واقع ہے، وہاں سے گوشالہ ہٹانے سے پہلے گوشالےمیں موجود گائیوں کو کسی دوسرے گوشالہ میں منتقل کرنا تھا،  انہوں نے اس بات پر سخت اعتراض جتایا کہ کوئی متبادل انتظام کئے بغیر ہی  قدم اٹھایاگیا ہے  اور بے زبان جانوروں کو سڑک پر چھوڑا گیا ہے۔انہوں نے کہا کہ  ریاست میں جب سدرامیا کی حکومت تھی تو اس وقت یہ زمین کوسٹ گارڈ کےلئے منظور کی گئی تھی۔ زمین کے اتی کرم مسئلہ کو حل کرنے کےبجائے ضلع انتظامیہ نے گوشالہ کو ہی منہدم کردیا ہے۔