منگلورو29/جون (ایس او نیوز) آج صبح جنوبی کینرا میں کورونا سے متاثرہ ایک 60سالہ خاتون فوت ہوگئی جس کے ساتھ ہی ضلع  دکشن کنڑا میں کووِیڈ سے مرنے والوں کی تعداد 14ہوگئی ہے۔ آج کورونا کی وجہ سے موت کا شکار ہونے والی خاتون کا تعلق منگلورو کے الال سے تھا اور وہ امراض قلب اور جگر کے علاوہ ذیابیطس کے مرض میں مبتلاتھی جس کے لئے اس کا علاج چل رہا تھا۔خیال رہے کہ کل 28جون کو جنوبی کینرا میں کووِڈ سے متاثرہ تین مریضوں کی ایک ہی دن موت واقع ہوگئی تھی۔

دوسری طرف کل شام کو جاری کی گئی ہیلتھ بلٹین میں  جنوبی کینرا میں کورونا وباء کے گراف میں 97نئے پوزیٹیو معاملات کے ساتھ زبردست اچھال دکھائی دیاہے بتایا گیا ہے کہ  بھٹکل کے  ایک عمر رسیدہ معروف شخصیت کی بھی رپورٹ کورونا پوزیٹیو آنے کی تصدیق ہوئی ہے۔   جنوبی کینرا میں اب تک 673کیس پوزیٹیو نکلے ہیں ان میں سے فی الحال 238ایکٹیو معاملے ہیں اور422افراد صحت یاب ہوچکے ہیں۔اتوار کے دن وینلاک ہاسپٹل سے 6مریضوں کو ڈسچارج کیا گیا ہے جن میں ایک خاتون بھی شامل ہے۔480افراد کی جانچ رپورٹ ابھی آنا باقی ہے۔9لوگوں کو نگرانی کے لئے اسپتال میں داخل کیا گیا ہے۔

 کل اتوار کے دن جن 97لوگوں کی رپورٹ پوزیٹیو آئی ہے ان میں 32افرد سعودی عربیہ، قطر اور ممبئی سے واپس لوٹے ہوئے ہیں۔

 جبکہ اڈپی ضلع میں 40نئے معاملے سامنے آئے ہیں۔جس کے ساتھ ضلع میں اب تک کورونا سے متاثرہونے والوں کی تعداد 1,179ہوگئی ہے۔ ان میں 18مرد، 15خواتین اور 6بچے شامل ہیں۔15متاثرین نے مہاراشٹرا سے سفر کیا ہے جبکہ ایک باگلکوٹ اور 2بنگلوروسے لوٹے ہیں۔6 ڈاکٹرس، ہیلتھ کیئر ورکرس اور کورونا واریئر کے طور پر سرگرم رہنے والے اورپچھلے مریضوں سے رابطے میں آنے والے16افراد شامل ہیں۔

 ایس ایس ایل سی کی طالبہ بھی کورونا پوزییٹیو: کل جو تازہ معاملے سامنے آئے ہیں ان میں پڈوبیدری کی ایک ایس ایس ایل سی امتحان دینے والی لڑکی بھی شامل ہے جس کے والد اور گھر کے ایک دوسرے فرد کی رپورٹ پوزیٹیو آئی تھی۔ اس لڑکی نے دو امتحانی پرچے لکھے تھے۔اب مزید دیگر پرچے لکھنے کی اسے اجازت نہیں دی جارہی ہے۔اس کے امتحانی مرکز اور کمرے کو پوری طرح سینیٹائز کردیاگیا ہے۔

 فی الحال73مریض ابھی آئسولیشن وارڈس میں داخل ہیں، جن میں اتوار کے دن داخل کیے گئے 8افراد بھی شامل ہیں۔266لوگو ں کی جانچ رپورٹ ابھی آنا باقی ہے۔ 

 اڈپی ضلع میں اتوار کے دن 10لوگوں کو صحت یابی کے بعد اسپتال سے ڈسچارج کیا گیا۔ اس طرح اب تک صحت یاب ہونے والوں کی تعداد 1051 ہوگئی ہے۔فی الحال اُڈپی ضلع میں 126ایکٹیو معاملے موجود ہیں۔