منڈیا 7 / مارچ  (ایس او نیوز) کرناٹکا اسمبلی احاطے میں مبینہ طور پر 'پاکستان زندہ باد' کے نعرے لگانے کے الزام میں تین افراد کی گرفتاری کے بعد منڈیا میں پیش آئے ایک ڈیڑھ سال پرانے معاملے میں 'پاکستان زندہ باد' کا نعرہ لگانے کے الزام میں دو بی جے پی کارکنان کو گرفتار کیا گیا جن کے شناخت روی اور آرادھیا کے  طور پر کی گئی ہے ۔ 
    
یاد رہے کہ اسمبلی والا معاملہ عام ہوتے ہی سوشیل میڈیا پر ایک کلپ وائرل ہوگئی جس میں دسمبر 2022 کے دوران منڈیا کے سنجے سرکل پر بی جے پی کی پاکستان مخالف ریلی میں 'پاکستان زندہ باد' کے نعرے لگائے گئے تھے ۔ 
    
اس ویڈیو کلپ کی بنیاد پر ایک ایڈوکیٹ نے منڈیا پولیس کے پاس شکایت درج کروائی جس پر کارروائی کرتے ہوئے منڈیا ویسٹ پولیس نے ملزمین کو گرفتار کیا ۔ یہ معاملہ جب پیش آیا تھا تو اس وقت بومئی کی قیادت میں بی جے پی کی حکومت تھی ۔
    
اصل میں بی جے پی نے مذکورہ ریلی پاکستانی وزیر خارجہ کی طرف سے وزیر اعظم نریندرا مودی کے خلاف دئے گئے ہتک آمیز بیان کی مخالفت میں نکالی تھی اور مظاہرین 'پاکستان مردہ باد' کے نعرے لگا رہے تھے ، لیکن روی اور آرادھیا نے 'مردہ باد' کی جگہ پر 'زندہ باد' کے نعرے لگائے  تھے ۔ 
    
جانکاروں کا کہنا ہے کہ اسمبلی میں نعرے بازی کے معاملے پر کارروائی کے ساتھ ڈیڑھ سال پہلے   کے معاملے پر کارروائی کرنا کانگریس کی طرف سے بی جے پی کو بالکل 'جیسے کو تیسا والا' جواب دینا ہے ۔