چلتی ٹرین پر سے مسافر گرپڑا؛ منکی ریلوے ٹریک پر ملی نعش؛ جیب سے برآمد ہونے والی رسید سے مہلوک کی ہوئی شناخت
بھٹکل 23 ستمبر (ایس او نیوز) چلتی ٹرین پر سے مسافر باہر گرنے سے اُس کی موت واقع ہوگئی جس کی شناخت سنتوش کمار ایم (48) کی حیثیت سے کی گئی ہے۔ حادثہ بھٹکل سے قریب 30 کلو میٹردور منکی ریلوے ٹریک پر پیش آیا، جہاں ایک شخص کی نعش لاوارث حالت میں پڑی ہوئی تھی۔
ریلوے ٹریک پرنا معلوم نعش کے پڑے ہونے کی اطلاع رات قریب دو بجے منکی پولس کو ملی جنہوں نے جائے وقوع پر پہنچ کر منکی کے معروف سماجی کارکن ذاکر کٹنگری اور فہیم شینگیری کی مدد سے نعش کو منکی سرکاری اسپتال منتقل کرایا۔
ذاکر نے ساحل آن لائن سے فون پر معلومات دیتے ہوئے بتایا کہ مہلوک شخص کی جیب سے صرف جرمانہ عائد کی گئی ریلوے کی ایک رسید ملی تھی، جبکہ یہ کون ہے کہاں سے کہاں جارہا تھا کچھ پتہ نہیں چلا تھا۔
منکی پی ایس آئی نے جرمانہ عائد کی گئی رسید سے اس بات کا پتہ لگایا کہ یہ شخص دہلی سے منگلا ایکسپریس پر کیرالہ کے ترویندرم جارہا تھا، بغیر ٹکٹ سفر کرنے کی وجہ سے متھورا میں ریلوے ماسٹر نے اس پر جرمانہ عائد کیا تھا جس کی رسید اس کی جیب سے برآمد ہوئی تھی، اُسی کو بنیاد بناتے ہوئے پولس نے چھان بین کو آگے بڑھاتے ہوئے اس کا نام اور دیگر معلومات حاصل کیں ہیں۔
نعش فی الحال منکی سرکاری اسپتال کے پوسٹ مارٹم روم میں رکھی گئی ہے۔ مزید چھان بین جاری ہے۔ پولس اس کے گھر والوں سے رابطہ کرنے کی کوشش کررہی ہے تاکہ پوسٹ مارٹم کے بعد نعش کو گھروالوں کے حوالے کی جاسکے۔
