مینگلور: جنوبی کینرا تک پہنچ گیا’ٹڈی دَل‘ کا حملہ۔ کورونا کے ساتھ کسانوں کے لئے شروع ہوگئی نئی آفت!
منگلورو، یکم جون (ایس او نیوز) پچھلے کچھ مہینوں سے راجستھان اور شمالی ہندوستان کی مختلف ریاستوں میں زرعی فصلوں کی تباہی کا سبب بننے والا ’ٹڈی دَل‘اب جنوبی کینرا تک پہنچ گیا ہے جس کی وجہ سے کورونا وباء اور لاک ڈاؤن سے پریشان حال کسانوں کی نیندیں حرام ہوگئی ہیں۔
اطلاعات کے مطابق کڈبا تعلقہ کے نوجی بالتیل گرام اور بیلیتنگڈی تعلقہ کے شیرلالو علاقے میں فصلوں پر ٹڈی دَل نے حملہ کردیا ہے۔اس دوران محکمہ زراعت کے ڈسٹرکٹ جوائنٹ ڈائریکٹر نے کسانوں کو دلاسہ دیتے ہوئے کہا ہے کہ وہ اس حملے سے پریشان نہ ہوں۔ محکمہ کی طرف سے سفارش کی گئی جراثیم کش دوائیاں فصلوں پرچھڑکنے سے ٹڈیاں فصل کو نقصان نہیں پہنچاتی ہیں اس لئے پہلی فرصت میں دوائیاں چھڑکنے کا کام کریں۔
خیال رہے کہ ٹڈی دل ہزاروں اور لاکھوں کی تعداد پر مشتمل ہوتا ہے۔ پھر ایک ساتھ جب یہ حملہ کرتے ہیں تو ذرا سی دیر میں پوری فصل کو تباہ کرکے رکھ دیتا ہے۔ ٹڈیوں کی خاصیت یہ ہے کہ وہ صرف دن کے وقت اڑتی ہوئی فصلوں پر حملہ کرتی ہیں اور رات کو درختوں اور پودوں پر آرام کرتی ہیں۔اس لئے رات کے وقت ان پر دوائیوں کا چھڑکاؤ کرکے علاقے سے بھگایا جاسکتا ہے۔اس کے علاوہ شور شرابا کرکے یا پھر تیز دھواں کرکے بھی ٹڈی دل کو بھگایا جاسکتا ہے۔لیکن جب ایک بار یہ فصلوں پر حملہ آور ہوتی ہیں تو اسے تباہ کرکے ہی دم لیتی ہیں۔ اس وقت ملک بھر میں کورونا کی وجہ سے عوام اور سرکاری افسرا ن پریشان ہیں اور اس پر ایک نئی آفت نے ملک کے مختلف علاقوں میں لوگوں کاجینا حرام کردیا ہے، جس میں سب سے زیادہ کسان متاثر ہورہے ہیں۔