کمٹہ میں کوارنٹین مرکز قائم کرنے کے خلاف مقامی عوام کا احتجاج۔ رہائشی علاقے سے دور منتقل کرنے کا مطالبہ
کمٹہ 17/مئی (ایس او نیوز) کمٹہ کے رہائشی علاقے کوپلکر واڈی میں قائم دیوراج ارس پوسٹ میٹرک گرلز ہاسٹل کو تعلقہ انتظامیہ کی طرف سے کوارنٹین مرکز میں بدلنے کے خلاف یہاں کے مقامی باشندوں نے احتجاج شروع کیا ہے اور وہ لوگ اس مرکز کو رہائشی علاقے سے دور رکھنے کی مانگ کررہے ہیں۔
خیال رہے کہ لاک ڈاؤن پروٹوکول کے مطابق بیرون ضلع یا بیرون ریاست سے جو لوگ کمٹہ میں آئیں گے ان کو 14دن تک کوارنٹین میں رکھنا لازمی ہے۔ تعلقہ انتظامیہ کی جانب سے سرکاری عمارتوں اور تعلیمی اداروں کی عمارتوں کو کوارنٹین کے مقصد سے حاصل کیا جاتا ہے۔ اسی وجہ سے مذکورہ ہاسٹل کو بھی کوارنٹین مرکز میں بدلنے کی کوشش جارہی ہے۔ مگر عوام اس کی سخت مخالفت پر اتر آئے ہیں۔ لوگوں کا کہنا ہے کہ اس علاقے میں کم ازکم 500مکانات موجود ہیں۔ دوہزار کے قریب افراد یہاں پر رہائش پزیر ہیں، جن میں غریبوں اور پسماندہ طبقات کی اکثریت ہے۔وہ لوگ روزانہ محنت مزدوری کرکے زندگی گزارتے ہیں۔ اور بس ابھی ابھی وہ کام دھندے پر جانے لگے ہیں۔ اگر کوارنٹین مرکز میں رکھے گئے لوگوں میں پوزیٹیو معاملات سامنے آتے ہیں تو یہاں کے رہائشی افرا د کے لئے یہ ایک خطرے کی گھنٹی ہوگی۔کیونکہ اس کے بعد اس علاقے کو سیل ڈاؤن کیا جائے گاا ور عوام کے لئے مزدوری کے لئے جانا ممکن نہیں ہوگا۔لہذا مانگ کی جارہی ہے کہ کوارنٹین کے لئے شہر کے مضافات اور آبادی سے دور علاقے میں مرکز قائم کیا جائے۔اور کسی قیمت پر بھی دیوراج ارس گرلز ہاسٹل میں لوگوں کو کوارنٹین نہ کیا جائے۔