بھٹکل شمس الدین سرکل پر ڈرینیج پائپ لائن مسئلہ- میونسپل کاونسلرس نے اُترکنڑا ڈپٹی کمشنر،بھٹکل اسسٹنٹ کمشنر اور بھٹکل میونسپل چیف آفیسر کو دیا میمورنڈم
بھٹکل 27 / فروری (ایس او نیوز) قلب شہر شمس الدین سرکل کے پاس زیر زمین ڈرینیج پائپ لائن بچھانے کا جو کام ہو رہا ہے اس سلسلے میں ہو رہی کوتاہی اور غیر سائنٹفک انداز میں پائپ بچھانے کی کوشش پر اعتراض جتاتے ہوئے بھٹکل ٹاون میونسپالٹی کے کاونسلرس نے ضلع اُترکنڑا ڈپٹی کمشنر، بھٹکل اسسٹنٹ کمشنر و میونسپل ایڈمنسٹریٹراور میونسپل چیف آفیسر کو میمورنڈم دیا اور مطالبہ کیا کہ پلان کے تحت اسے وینکٹاپور ایس پی ٹی کی طرف موڑا جائے۔
ٹاون میونسپل کونسل کے جملہ 23 میں سے 19 کاونسلرس کی دستخط کے ساتھ دئے گئے اس میمورنڈم میں کہا گیا ہے کہ شمس الدین سرکل پر \ شانبھاگ اینٹر پرائزس ہوناور کی طرف سے ایم ایچ حمید نامی ٹھیکیدار جو زیر زمین ڈرینیج کی پائپ لائن بچھانے کا کام کر رہا ہے اس کی گریویٹی کو شہر کے نچلے نشیبی علاقے کی طرف موڑتے ہوئے گندے پانی کے بہاو کو غوثیہ اسٹریٹ میں واقع ویٹ ویل کی طرف موڑ دیا ہے۔
ایسی صورت میں اوپری علاقے سے زیادہ مقدار میں گندے پانی کا بہاو غوثیہ اسٹریٹ کے ویٹ ویل میں آنے کے امکانات پیدا ہو گئے ہیں جس کے نتیجے میں اس ویٹ ویل پر طاقت سے زیادہ دباو پیدا ہوگا اور خدشہ ہے کہ اس کی وجہ سے گندہ پانی نشیب کے رہائشی علاقے میں گھروں اور کنووں میں گھس جائے گا۔
میمورنڈم میں کہا گیا ہے کہ ٹھیکیدار نے اوپری علاقے سے ڈرینیج کے پانی کو غوثیہ اسٹریٹ کے ویٹ ویل کی طرف موڑنے کا جو کام کیا ہے اس کے لئے ٹی ایم سی سے کوئی اجازت نامہ بھی حاصل نہیں کیا ہے ۔ اس کے علاوہ غوثیہ اسٹریٹ کے ویٹ ویل کی صلاحیت سے زیادہ پانی کی مقدار بڑھنے سے پانی ویٹ ویل سے باہر بہنے کے جو امکانات پیدا ہوئے ہیں اس کے تعلق سے بھی ضروری کارروائی کی جائے۔
میمورنڈم میں مطالبہ کیا گیا ہے کہ شمس الدین سرکل سے پانی کا بہاو نچلے علاقے میں موڑتے ہوئے جو ڈرینیج پائپ لائن بچھائی جا رہی ہے، اسے درست کیا جائے اور اس سے پہلے اوپری علاقے کا پانی جس طرح وینکٹا پور میں موجود ایس ٹی پی کی طرف بہہ رہا تھا، اسی انداز میں شمس الدین سرکل علاقے کی پائپ لائن کی گریویٹی رکھی جائے اور اس پانی کو وینکٹاپور کی ایس پی ٹی کی طرف ہی موڑا جائے۔
بھٹکل اے سی دفتر میں اسسٹنٹ کمشنر ڈاکٹر نینا اور میونسپل افس میں میونسپل چیف آفیسر نیلکنٹھ میستا نے میمورنڈم وصول کیا۔ موجود کونسلروں نے بتایا کہ ڈپٹی کمشنر کاروار کو بذریعہ پوسٹ میمورنڈم روانہ کیا گیا ہے۔ اس موقع پر کونسلرس قیصر محتشم، فیاض ملا، الطاف کھروری، عبد الروف نائطے اور عبد العظیم موجود تھے۔
