کنداپور4/اپریل (ایس او نیوز) ساحلی کرناٹک ہی نہیں، بلکہ پورے ملک میں کہیں پر بھی اب مودی لہر نہیں ہے، مودی نے عوام کو صرف جھوٹے وعدے اور جھوٹی اُمیدیں دی ہیں، 2014 میں جب مودی نے بڑے بڑے وعدے کئے  تو عوام نے بڑے بڑے سپنے سجاکر مودی کو اقتدار سونپا تھا، مگر مودی نے ایک بھی وعدہ پورا نہیں کیا۔  کرناٹک کے لئے بھی  مودی کی دین صفر ہے، ان باتوں کا اظہار ریاست کے وزیراعلیٰ ایچ ڈی کماراسوامی نے کیا۔ وہ یہاں کنداپور میں بدھ کی شام کو  خواتین ماہی گیروں کی  کانفرنس کا افتتاح کرنے کے بعد   خطاب کررہے تھے۔

اُڈپی۔چکمنگلور لوک سبھا حلقہ کے  کانگریس ۔جے ڈی ایس  متحدہ  اُمیدوار  پرمود مدھوراج   کے لئے  انتخابی پرچار کرتے ہوئے  کماراسوامی نے کہا کہ  مودی لہر اب ختم ہوچکی ہے اور اگلے انتخابات میں مودی کا دوبارہ اقتدار پر آنا ناممکن ہے، اسی لئے  مودی   اپوزیشن کو ڈرانے کے لئے  کرناٹک میں وزراء کی رہائش گاہوں پر انکم ٹیکس  کے چھاپے  لگارہے ہیں۔ کماراسوامی نے پوچھا کہ مرکزی ایجنسیاں بی جے پی وزراء کے پاس موجود کروڑوں کی بلیک منی  کو لے کر خاموش کیوں ہیں ؟  بی جے پی کے وزراء اسی بلیک منی کے ذریعے  اپوزیشن پارٹیوں کے  ارکان اسمبلی کو خریدنے کے لئے کروڑوں کی پیش کش کررہے ہیں، مگر مرکزی آفسران بی جے پی کے ایسے لیڈران کے تعلق سے  خاموش  ہیں۔ کماراسوامی نے مرکزی ایجنسیوں کے آفسران کو چیلنج کیا کہ اگر اُن میں دم ہیں تو ایسے لیڈران کے خلاف کاروائی کرکے دکھائیں۔

کماراسوامی نے کہا کہ   مودی نے ملک  کو آگے بڑھانے  کے لئے کوئی صحیح پروگرام مرتب نہیں کیا، انہوں نے عوام کو بڑے بڑے ایسے وعدے کئے  کہ عوام اُن کے جھانسے میں آگئے ، مگر  مودی اب آئندہ کبھی وزیراعظم نہیں بن سکیں گے ۔ انہوں نے کہا کہ  مودی نے ساحلی کرناٹک میں  مختلف فرقوں کے درمیان   اشتعال انگیزی پھیلانے کا کام کیا ہے، مگر اب ہمارے نوجوان ان کے بہکاوے میں نہیں آئیں گے۔ آگے کہا کہ ساحلی کرناٹک میں  کانگریس۔جے ڈی ایس مخلوط حکومت نے  امن و امان کی فضا قائم رکھی ہے اب عوام کو چاہئے کہ وہ  بی جے پی اُمیدوار کو سبق سکھائیں ۔

کماراسوامی نے کہا کہ وزیر اعظم مودی نے  ملک کے عام عوام کی زندگی غلط پالیسیوں کی وجہ سے اجیرن کرکے رکھ دی ہے،  نوٹ بندی اور جی ایس ٹی کے نفاذ نے چھوٹے تاجروں کو برباد کردیا ہے۔ ملک میں کالا دھن میں اضافے کے لئے مودی   بلواسطہ طور پر  ذمہ دار ہیں۔ کماراسوامی نے مودی پر   سیاسی  پرچار کے لئے   فوجیوں کو ملک  کے تحفظ کے نام پر قربان کرنے کا بھی الزام لگایا۔

اُڈپی کے ملپے سمندر سے لاپتہ ہونے والے سات ماہی گیروں کے تعلق سے وزیراعلیٰ کماراسوامی نے کہا کہ   ان ماہی گیروں کا پتہ لگانے کے لئے  اُڈپی۔چکمنگلور کی ایم پی شوبھا کرندلاجے نے  ایک پیسے کا کام نہیں کیا حالانکہ مرکز میں اُن کی ہی حکومت ہے۔ کماراسوامی نے کہا کہ  کسی شخص کے لاپتہ ہونے کے بعد  اُسے مردہ قرار د ینے کے لئے سات سال تک انتظار کرنے کا قانون ہے،  مگر ہماری سرکار نے  لاپتہ ماہی گیروں کے خاندان کو  ابتدائی طور پر  فوراً ایک لاکھ روپیہ  کا معاوضہ فراہم کیا ہے۔ انہوں نے کہا کہ لاپتہ ماہی گیروں کی تلاشی کا کام ہنوز جاری ہے اور اس تعلق سے ریاستی سرکار،   وزیردفاع   اور مہاراشٹرا سرکار  کے رابطے میں ہیں۔ 

خیال رہے کہ کنداپور میں  منعقدہ اس پروگرام کے بعد وزیراعلیٰ  بذریعہ روڈ بھٹکل ہوتے ہوئے کاروار کے لئے روانہ ہوگئے۔