کنداپور،22؍ اکتوبر (ایس او نیوز) پتور تعلقہ کے امپارو گاوں میں 19 اکتوبر کو خودکشی کا جو معاملہ سامنے آیا تھا اور وہ قتل کی واردات میں تبدیل ہوگیا ہے جس کے بعد پولیس نے مقتول کی بیوی، اس کے آشنا اور دو نابالغ بچوں کو گرفتار کر لیا ۔

ناگ راج (36 سال) کو قتل کرکے اسے خودکشی کا روپ دینے کے جرم میں گرفتار ملزمین کی شناخت مقتول کی بیوی مامتا (34 سال)، اس کے آشنا کمار اور دینکر کے طور پر کی گئی  ہے جبکہ اس کے دو نابالغ بچوں کو پولیس نے تحویل میں لینے کے بعد ریمانڈ ہوم بھیج دیا ۔

بتایا جاتا ہے کہ جب ناگ راج کی لاش شنکر نارائن ہاسپٹل میں پوسٹ مارٹم کے لئے رکھی گئی تو اس کے رشتہ داروں نے دیکھا کہ اس کے جسم اور گلے کے پاس زخموں کے نشان موجود ہیں ۔ جس کے بعد ناگ راج کی بہن ناگ رتنا نے اسے خودکشی کا معاملہ نہ مانتے ہوئے پنے بھائی کو  قتل کیے جانے کا شبہ ظاہر کیا ۔ اس نے پولیس کو یہ بھی بتایا کہ چند دن قبل ناگ راج نے اسے فون کرکے بتایا تھا کہ اس کی بیوی اور دوسرے لوگوں نے اس کے ساتھ مارپیٹ کی ہے ۔ 

پولیس نے تحقیقات کی تو قتل کیے جانے کی بات  ثابت ہوئی اور اس نے خودکشی کے کیس کو بدل کر قتل کا کیس رجسٹر کرلیا ۔ 

مقامی لوگوں کا کہنا ہے کہ  ناگ راج ایک عادی شرابی تھا اور نشہ میں دھت کر گھر میں روز ہنگامہ کھڑا کیا کرتا تھا ۔ اس کی بیوی کے ناجائز تعلقات چل رہے تھے اور یہی اس کے قتل کی وجہ ہے ۔