کمٹہ: کئیرے کراس کی سڑک پر مٹی کا ڈھیر : ایک برس بعد بھی آئی آر بی کمپنی کی آنکھیں بند ؛عوام اور سواروں کی طرف سے سخت برہمی کا اظہار
کمٹہ :13؍ اکتوبر(ایس اؤ نیوز) تعلقہ کے مرجان گرام پنچایت حدود میں کئیرے کراس پر پہاڑ کھسکنے سے سڑک پر مٹی کا ڈھیر جمع پڑا ہے ، ایک سال بیت چکا ہے ، ابھی تک مٹی صاف نہیں کیا گیا ہے۔ جس پر سخت ردعمل کا اظہار کرتےہوئے عوام اور راہ گزاروں نے آئی آر بی افسران کے خلاف ناراضگی کا اظہارکیاہے۔
انکولہ۔ کمٹہ شاہراہ کے ورگدے سے ہوتےہوئے کمٹہ ۔ سرسی شاہراہ کو جوڑنے والی کئیرے کراس پر واقع اہم سڑک پر پہاڑ کھسکنے سے مٹی پڑی ہوئی ہے جس کےنتیجے میں آدھی سڑک بند ہوکر ایک سال ہو چکا ہے، مگر ابھی تک صفائی کا کام نہیں ہواہے۔ اس کی وجہ سے متعلقہ سڑک پر سے گزرنے والے سواروں کو ہرروز مشکلات کا سامنا کرنا پڑرہا ہے۔
سرسی سے گوکرن، کاروار وغیرہ جانےوالی بسیں اور سیکڑوں سواراسی سڑک سے گزرتے ہیں۔ پہاڑ کھسکنے کے بعد بارش کے موسم میں بائک جانے کےلئے راستہ صاف کیاگیا تھا۔ اب سبھی سواریاں وہاں سے آجارہی ہیں، لوگ تشویش کا اظہار کررہے ہیں کہ ایک طرف آئی آر بی کمپنی صفائی کےلئے کوئی قدم نہیں اُٹھارہی ہے وہیں دوسری طرف تعلقہ انتظامیہ بھی خاموش ہے۔
آئی آر بی کمپنی کی غافل پالیسی کےخلاف برہمی کا اظہار کرتےہوئے مقامی عوام نے ہی کسی طرح سڑک کو تھوڑا بہت صاف کرکے سواریوں کےلئے جگہ بنائی ہے۔ یہاں لاک ڈاؤن کے بعد سواریوں کی چہل پہل زیادہ ہوگئی ہے۔ ایک خطرے والے گھماؤ کی سڑک پر ڈھیر ساری مٹی کے پڑےرہنے سے سواروں کو نہ صرف تکلیف و پریشانی ہورہی ہے بلکہ حادثے کا بھی خطرہ پیدا ہوگیا ہے۔