کنداپور 28 ڈسمبر (ایس او نیوز) شادی کی محفل میں گھس کر  پولس نے اچانک لاٹھیاں برسانی شروع کردی جس کے نتیجے میں دلہا سمیت کئی مہمان  زخمی ہوگئے۔ واردات پیر کی شب قریب دس بجے کنداپور تعلقہ کے کوٹا میں پیش آئی ہے جہاں دلت ذات کے کوراگا طبقہ سے تعلق رکھنے والے   ایک مکان میں شادی کی تقریب چل رہی تھی۔

ذرائع سے ملی اطلاع کے مطابق  کمٹہ کی لڑکی سے 29 ڈسمبر کو شادی طئے ہے،مگر 27 دسمبر پیر کی شب کو ییہاں مہندی کی رسم  نبھائی جارہی تھی جس کے لئے قریبی رشتہ دار بھی آئے ہوئے تھے۔ بتایا گیا ہے کہ گھر پر شادی کی خوشی میں  بڑی آواز میں ڈی جے پر میوزک بج  رہی تھی جس پر ناراض پولس اہلکار اچانک گھر  کے اندر گھس گئے اور لاٹھیاں برسانی شروع کردی۔ پولس پر الزام ہے کہ انہوں نے بچے، بوڑھے  اور  خواتین کو بھی نہیں بخشا، یہاں تک کہ دلہا بھی  زخمی ہو گیا اور اسے دیگر لوگوں کے ساتھ  اسپتال میں بھرتی کرانا پڑا۔

کچھ لوگوں نے بتایا کہ  ڈی جے پر جب میوزک بج رہا تھا تو  کسی  نے 112 ڈائل کر کے پولس کو شکایت کی تھی، جس پر  کاروائی کرتے ہوئے کوٹا پولس جائے وقوع پر پہنچی تھی اور میوزک کی بڑی آواز سنتے ہی لاٹھی چارج شروع کردیا تھا۔

واردات میں دلہا راجیش سمیت نو لوگوں کو  زخمی حالت میں سرکاری اسپتال میں بھرتی کیا گیا ہے۔ اخبارنویسوں  سے گفتگو کرتے ہوئے عینی شاہدین نے بتایا کہ   مہندی کا پروگرام چلنے کےدوران پولس اچانک گھر کے اندر گھس گئی  اور کہا کہ ڈی جے کو بند کردو، جیسے ہی  گھر والے  ڈی جے کو بند کرنے کے لئے آگے بڑھے،  پولس  نے بند کرنے کا  انتظار کئے بغیر ہی لاٹھیاں برسانی شروع کردی، اس دوران  پولس نے گھر کی لائٹوں کو بھی بند کردیا۔  پتہ چلا ہے کہ پولس نے بوڑھے بزرگ ، بچے اور خواتین کو بھی  نہیں بخشا اور جو بھی سامنے آیا، اُن کی بری طرح پیٹائی کی۔

پتہ چلا ہے کہ پولس نے پہلے رات نو بجے آکر ڈی جے کو بند کرنے کے لئے کہا تھا، اس پر گھر والوں نے بتایا تھا کہ  شادی کی محفل میں گھر کے قریبی رشتہ دار موجود  ہیں اور کل  28 ڈسمبر سے نائٹ کرفیو بھی شروع ہورہا  ہے، اس لئے تھوڑی دیر کے لئے ڈی جے کو بجنے دیں۔ پولس واپس لوٹ جانے کےبعد 9:40 کو دوبارہ لوٹ آئی اور کسی کو کچھ بتائے بغیر لاٹھیاں  برسانی شروع کردی اور ڈی جے کو بند کرنے کے ساتھ ساتھ لائٹ کو بھی بند کردیا۔  بتایا گیا ہے کہ بعد میں پولس نے دلہا اور  ایک دلت لیڈرسمیت بعض   دیگر لوگوں کو اپنےساتھ پولس تھانہ بھی لے گئی۔

واقعے کی اطلاع ملتے ہی   مقامی لوگ برہم ہوگئے اور پولس تھانہ پہنچ کر  احتجاج کرنا شروع کردیا، جس کے بعد دلہا اور دیگر لوگوں کو رہا کیا گیا۔  بعد میں منگل 28 ڈسمبرصبح  دلت لیڈران نے پولس تھانہ کا گھیراو کیا اور متعلقہ پی ایس آئی اور دیگر پولس اہلکاروں کو فوری معطل کرنے کا مطالبہ کرنے لگے۔ برہماور سرکل پولس انسپکٹر اننتھا پدمانابھا سمیت دیگر اہلکار وں نے جائےوقوع پر پہنچ کر احتجاجیوں سے گفتگو کی۔ اس موقع پر دلت لیڈران نے  مطالبہ کیا کہ  خاطی پولس اہلکاروں کے خلاف قانونی کاروائی کی جائے اور ایک  دپارٹمنٹل انکوائری بٹھائی جائے۔ واقعے پر علاقہ کے عوام میں سخت ناراضگی پائی جارہی ہے، ایسے میں   پولس کاروائی کی بعض وڈیو سوشیل میڈیا پر وائرل ہوگئی ہے۔ دلت لیڈران سمیت علاقہ کے عوام نے متنبہ کرایا ہے کہ اگر خاطی پولس اہلکاروں کے خلاف فوری کاروائی نہیں کی گئی اور اُنہیں معطل نہیں کیا گیا  تو احتجاجی ریلی نکالی  جائے گی۔