کاسرگوڈ،  22 ؍جنوری (ایس او نیوز) پاپولر فرنٹ آف انڈیا کی طرف سے ریاست گیر ہڑتال منانے کے دوران  جو نقصانات ہوئے تھے اس کی بھرپائی کے لئے کیرالہ ہائی کورٹ کی ہدایات پر عمل کرتے ہوئے پولیس نے ریوینیو افسران سے تال میل کے ساتھ پی ایف آئی لیڈروں کی جائدادیں ضبط کرنے کا عمل شروع کیا ہے ۔
    
خیال رہے کہ پی ایف آئی نے این آئی اے کے ذریعے اپنے لیڈروں کی گرفتاری کے خلاف احتجاج کرتے ہوئے 22  ستمبر 2022 کو ریاست گیر ہڑتال کا اعلان کیا تھا ۔ پولیس نے ہائی کورٹ میں جو رپورٹ داخل کی ہے اس کے مطابق اس ہڑتال کے دوران پی ایف آئی کے کارکنان نے 5.20 کروڑ روپوں کا نقصان کیا تھا ۔ اس پر ہائی کورٹ نے اس نقصان کی بھرپائی کے لئے پی ایف آئی لیڈروں کی جائدادیں ضبط کرنے سے متعلق مکمل رپورٹ ریاستی ریوینیو کمشنر کوسونپنے کا حکم دیا ہے ۔  
    
عدالت کی اس ہدایت کے تحت پولیس نے جن جائدادوں کو قرق کرنے کا سلسلہ شروع کیا ہے اس میں چنداگیری چیرٹیٹبل ٹرسٹ کی جائداد ہے جہاں سے پی ایف آئی کا ضلع دفتر کام کرتا تھا ۔ اس کے علاوہ پی ایف آئی لیڈر محمد علی ، این ایو عبدالسلام، عمر فاروق، ننجرت سراج الدین ہوسادرگا، سی ٹی سلیمان وغیرہ کی جائدادیں بھی ضبط کی جائیں گی ۔