کاروار،4؍اکتوبر (ایس او نیوز) اینڈو سلفان متاثرین کی باز آبادکاری پروگرام کے تحت scowesنامی سرسی کے ادارے کو موبائل ہیلتھ کلینک (ایمبولینس) چلانے کا ٹھیکہ دیا گیا تھا۔ جس کے ذریعے ضلع میں اینڈوسلفان متاثرین کے گھر گھر جاکر انہیں طبی خدمات فراہم کی جاتی ہے۔لیکن  scowesملازمین کا کہنا ہے کہ ضلع کے 6تعلقہ جات میں اپنی خدمات انجام دے  رہے اس ادارے کے طبی  اورنیم طبی عملے کوگزشتہ 7مہینوں سے ان کی تنخواہ حکومت کی طرف سے ادارے کو ادا نہیں کی گئی ہے جس سے اس ادارے پر مالی بوجھ بڑھ گیا ہے۔

تنخواہوں کے لئے فنڈجاری کرنے والے افسران جو بے توجہی برت رہے ہیں  اس کے خلاف کاروار  میں scowesسرسی کے ایکزیکٹیو ڈائریکٹر ڈاکٹر وینکٹیش نائک اور ملازمین نے ڈپٹی کمشنر ،ضلع پنچایت سی ای او کے علاوہ ایم ایل اے روپالی نائک سے ملاقات کی اور اپنی بقایا تنخواہ کا مطالبہ کرتے ہوئے میمورنڈم دیا ۔جس میں کہا گیا ہے کہ موبائل ہیلتھ کلینک کے ذریعے ڈاکٹر، فیزیو ٹھیراپسٹ ، اسٹاف نرس، ہیلتھ اسسٹنٹ وغیرہ پر مشتمل عملہ روزانہ اینڈوسلفان متاثرین کے گھر کے دروازے تک پہنچ کر طبی امداد فراہم کرتا ہے ۔لیکن    اینڈوسلفان متاثرین کی میڈیکل ریلیف کے لئے رقم جاری کرنے کی گنجائش رہنے کے باوجودمتعلقہ  افسران کی طرف سے خواہ مخواہ فنڈ   کو روکا گیا ہے۔اس طرف حکومت کی توجہ دلانے کے لئے یہ میمورنڈم  دیا گیا ہے۔اس میں واضح کیا گیا ہے کہ بقایا تنخواہ ادا ہونے تک موبائل کلینک  کے اسٹاف اپنی خدمات فراہم نہیں کریں گےاوریہ ہڑتال غیر معینہ مدت تک جاری رہے گی۔

ضلع ڈپٹی کمشنرنے میمورنڈم قبول کرنے کے بعد اینڈوسلفان موبائل کلینک اسٹاف کے مسائل جو بتائے گئے ہیں میں حکومت کی توجہ اس پر مبذول کرتے ہوئے انہیں حل کرنے کی کوشش کروں گا۔